‏ Hebrews 9

Чилел алай пакханада Аллагьдиз икрам авун

1 Сифтегьан Икьрарда Аллагьдиз икрам авунихъ галаз алакъада авай серенжемар ва чилел пакхана алай. 2Алачух эцигнай, ва адан сад лагьай паюна чирагъган ва Реббидин вилик жедай фар алай экӀягъан авай, и паюниз «Пакди» лугьузвай. 3Кьвед лагьай паюниз «Паквилерин Пакди» лугьузвай ва ам сад лагьай паюнивай пердедалди чара авунвай. 4Иер ни галай затӀар кудай, къизил чӀугунвай къурбанган ва вири патарихъай къизилдалди кӀевнавай Икьрардин сандух аниз талукь тир. Сандухда мангьудив ацӀай къизилдин къаб, Гьарунав хьайи цуьк авур лаш ва Икьрардин къванцин къаябар авай. 5Сандухдин винелай чӀехи малаикрин кӀалубар – баркалладин яржар алай, абуру вичиз «Гунагьар алудзавай чка» лугьузвай сандухдин къапсахдал лувар экӀянавай. Амма исятда идакай чун галай-галайвал рахадач.

6Вири гьа и саягъда туькӀуьр хьайидалай гуьгъуьниз хахамар чпин ибадат авун патал вахт-вахтунда Алачухдин сад лагьай паюниз гьахьзава. 7Амма кьвед лагьай паюниз гьахьдай ихтияр йиса са гъилера анжах кьилин хахамдиз ава. Аниз гьахьайла, адав вичин паталай ва халкьди хабар авачиз ахъайнавай гунагьрай гъизвай ивини жедай. 8Гьадалди Пак Руьгьди виликан Алачух гьеле кардик кумай кьван гагьда цавараллай Паквилерин Пак чкадиз фидай рехъ гьеле ахъа хьанвачирди къалурзава. 9Гьа ина алай вахт паталдини чешне ава: садакьайривайни къурбандривай Аллагьдиз икрам ийизвайдан виждан михьи ийиз ва ам тамамвилихъ гъиз жедач. 10И серенжемар анжах тӀуьнихъ ва хъунихъ ва чуьхуьн къачунин жуьреба-жуьре адетрихъ галаз алакъада ава. Вири ибур анжах винел патан акунар авай серенжемар я ва абур анжах цӀийи къайда эцигдай вахтуналди къуватда жеда.

Цавун Алачухда ибадат авун

11Амма пайда хьайи хъсанвилерин кьилин хахам яз атай Месигь авайдалайни чӀехи ва тамам алачухдиз, инсанрин гъилералди эциг тавунвай, яни и дуьньядиз талукь тушир алачухдиз, гьахьна. 12Ам аниз кьунаринни данайрин иви гваз ваъ, Ам Паквилерин Пак чкадиз Вичин Иви гваз, инсанар патал эбеди яз эвезар хгунин мумкинвал къачуз садра ва эбеди яз гьахьна. 13Кьунаринни яцарин иви ва гьакӀни канвай дуьгведин руьхъ квай яд хъичир авуни чиркинбур пак, адет паталди михьи хъийизватӀа, 14Вичи Вич эбеди Руьгьдин къуватда аваз Аллагьдиз са рехнени квачир къурбанд авур Месигьдин Ивиди кьиникьихъ тухузвай крари леке гъанвай чи виждан генани гзаф михьи ийида! Адан Ивиди чаз чан алай Аллагьдиз къуллугъ ийидай мумкинвал гуда!

15Гьавиляй Месигь, эвернавайбурув чпиз хиве кьунвай эбеди ирс агакьун патал, цӀийи Икьрардин арачи язва. И кар Адан кьиникьи абуру гьеле сифтегьан Икьрардин шартӀара ахъаяй гунагьрилай гъил къахчудайвал авун себеб яз хьана.

16Веси анжах веси ийизвайдан кьиникь тестикь хьайидалай гуьгъуьниз къуватда гьатзава. 17Амма веси ийизвайдал гьеле чан аламатӀа, весидихъ са къуватни авач. Веси ийизвайди кьейидалай кьулухъ веси къуватда гьатзава. 18Гьавиляй сифтегьан Икьрарни иви галачиз тестикь хьанач. 19ГьикӀ лагьайтӀа Мусади вири халкьдиз Къанундин вири тагькимар лагьайдалай гуьгъуьниз ада, данайринни кьунарин иви къачуна, цик акадарна, аник экуь яру сар ва иссуп набататдин хел кяна, иви ктабдал вичел ва вири халкьдал хъичирна. 20Ада лагьана: «Им Икьрардин иви я, адан шартӀар кьилиз акъудун Аллагьди квевай кӀевелай тӀалабзава» ^a. 21Ада гьакӀ Алачухдални, Аллагьдиз ибадат авунин карда гъилик жезвай вири затӀарални иви хъичирна. 22Къанунди саки вирибур ивидалди михьи хьун кӀевелай тӀалабзава, иви авадар тавунмаз гунагьрилай гъил къахчудач.

23Цавара авайдалай чешне къачуна чилел авунвай кьван вири крар гьа и саягъда михьи хьун лазим я, амма цаваринди ибурулай хъсан къурбандралди михьи хьана кӀанда. 24Месигь инсандин гъилералди авунвай ва вич халисдан анжах хъен-шикил тир чилин пакханадиз ваъ, Ам чи паталай Аллагьдин вилик пайда хьун патал цавариз гьахьна. 25Кьилин хахам гьар йисуз чарадан иви гваз Паквилерин Пак чкадиз гьахьдайвал, Месигь цавариз Вич мад ва мад къурбанд авун патал гьахьнач. 26ИкӀ туширтӀа, Ада дуьнья халкь хьайидалай инихъ эгечӀна гзаф гъилера азабар чӀугун лазим жедай. Амма Ам исятда, эхиримжи вахтара, са гъилера пайда хьана, садра ва эбеди яз гунагь терг авун патал, Ада Вичи Вич къурбанд авуна. 27Гьар са инсандиз садра кьиникь ва ахпа дуван ганвайвал, 28Месигьни, гзаф инсанрин гунагьрилай гъил къахчун патал, садра къурбанд авунай, ва Ам кьвед лагьай гъилера Вичел гунагь къачун патал ваъ, Вич атунал вил алаз акъвазнавайбур хиласун патал къведа.