Mat 5 | LezIBTNT | STEP | Къвезвай кьван халкь акурла, Иса пелел хкаж хьана. Ам анал ацукьайла, Адан патав тилмизар агатна.

‏ Matthew 5

Пелел авур вязер

(ЛкӀ. 6:20-23)

1 Къвезвай кьван халкь акурла, Иса пелел хкаж хьана. Ам анал ацукьайла, Адан патав тилмизар агатна. 2 Ам абуруз чирвилер гуз эгечӀна:

3 – Бахтавар я Аллагьдин вилик затӀни авачирбур, Цаварин Пачагьлугъ гьабурунди я!

4 Бахтавар я шехьзавайбур, Аллагьди абуруз теселли гуда!

5 Бахтавар я умунбур, абуруз ирсинай чил акъатда!

6 Бахтавар я гьахъ-михьивилихъ гишинбур ва къанихбур, абур тух жеда!

7 Бахтавар я регьим гвайбур, абуруз Аллагьди регьим ийида!

8 Бахтавар я михьи рикӀ авайбур, абуруз Аллагь аквада!

9 Бахтавар я ислягьвал гъизвайбур, абуруз Аллагьдин веледар лугьуда!

10 Бахтавар я Аллагьдиз кӀанзавайди кьилиз акъудзава лугьуз хурук кутунвайбур, Цаварин Пачагьлугъ гьабурунди жеда!

11 Зи терефдарар я лугьуз, инсанри куь намусдик хкӀурдайла, куьн хурук кутадайла, куьне жуьреба-жуьре чӀуру крар авуна лугьуз квек квачир тахсирар кутадайла, куьнни бахтавар жеда. 12 Куьне чӀехи шадвилер ая, цаварал квез Аллагьди зурба савкьват гьазурнава. Квелай вилик хьайи пайгъамбарарни гьа икӀ хурук кутунай.

Кьелни экв

(Мрк. 9:50; ЛкӀ. 11:33; 14:34-35)

13 Куьн чилин кьел я. Кьелен ери квахьайтӀа, ам гьикӀ уькӀуь хъийиз жеда? Мад ам са куьнизни герек хкведач, ам инсанрин кӀвачерик гадарда.

14 Куьн дуьньядин экв я. Дагъдин кукӀушдал эцигнавай шегьер чуьнуьхариз жедач. 15 КуькӀуьрнавай шем къапунин кӀаник кутадач, кӀвале авайбуруз экв гун патал, ам шемерганда твада. 16 Гьа саягъда куь экуьнини инсанриз экв гун лазим я. Абуруни, куьне ийизвай хъсан крар акваз, цавараллай куь Бубадин тариф ийида.

Къанундикай

(ЛкӀ. 16:17)

17 Куьне Зун Мусади кхьенвай Къанун ва пайгъамбаррин кхьинар чӀуриз атанва лугьуз фикирмир. Зун абур чӀуриз ваъ, абуру лагьай кьван вири крар кьилиз акъудиз атанвайди я. 18 За квез рикӀивай лугьузва: цаварни чил амай кьван гагьда Къанунда кхьенвайбур кьилиз акъат тавунмаз, анай гьич са гъвечӀи гьарфни, гьич са цӀарни квахьдач. 19 Гьа икӀ, ни и гъвечӀи тагькимрикай сад хьайитӀани чӀурайтӀа ва гьакӀ амай инсанриз абур чӀуриз чирайтӀа, Цаварин Пачагьлугъда ам виридалайни гъвечӀиди жеда. Ни и тагькимар кьилиз акъудиз хьайитӀа ва абур кьилиз акъудиз масадбуруз чириз хьайитӀа, гьам Цаварин Пачагьлугъда чӀехиди жеда. 20 За квез лугьузва хьи, куьне Аллагьдиз кӀанзавайди тавратдаррилайни фарисейрилай хъсандиз кьилиз акъудиз тахьайтӀа, квевай Цаварин Пачагьлугъдиз гьахьиз жедач.

Хъилекай

(ЛкӀ. 12:58-59)

21 Дегь чӀавара инсанриз лагьай гафар квез ван хьана: «Ягъна рекьимир» ^a, «Ни яна кьейитӀа, адан дуван авуна кӀанда» ^b. 22 Амма За квез лугьузва хьи, жуван стхадикай хъел къвезвайдан дуванни авуна кӀанда. Ни вичин стхадиз «Вун са затӀни туш» лагьайтӀа, адан дуван Меслягьатди авун герек я. Ни са масадаз «КӀамаш» лагьайтӀа, ам жегьеннемдин цӀуз аватун герек я. 23 – 24 Гьа икӀ, вун къурбангандал Аллагьдиз къурбанд авун патал, хеб-мал гваз атайла, ви рикӀел ви стхадин рикӀ вакай ханвайди хтайтӀа, вав гвай къурбандар са къерехдив тур. Фена сифте жуван стхадихъ галаз туьхкӀуькӀ, ахпа хтана жуван къурбандар ая. 25 Вахъ галаз гьуьжетарзавайда вун дувандиз тухузватӀа, аниз фидай рекье адахъ галаз туьхкӀуьз алахъ. ТахьайтӀа, ада вун дуванбегдин, дуванбегдини вун вичиз куьмекарзавайдан гъиле твада, адани вун къазаматда твада. 26 За ваз рикӀивай лугьузва: вал алай бурж эхиримжи кепекдал къведалди вахгун тавунмаз вун къазаматдай акъатдач.

Зинавиликай

(МатӀ. 18:8-9; Мрк. 9:43-48)

27 Инсанриз лагьай гафар квез ван хьана: «Зинавал ийимир» ^c. 28 Амма За квез лугьузва хьи, гьар вуж са папаз темягьдалди килигайтӀа, ада вичин рикӀе адахъ галаз зинавал авуна. 29 ЭрчӀи вили вун гунагь ийидай йикъаз гъизватӀа, вуна ам акъудна гадара: ви вири беден жегьеннемдин цӀуз аватдалди, бедендин са чка терг хьун ваз хъсан я. 30 ЭрчӀи гъили вун гунагь ийидай йикъаз гъизватӀа, вуна ам атӀана гадара, ви вири беден жегьеннемдин цӀуз аватдалди, бедендин са чка терг хьун ваз хъсан я.

Чара хьуникай

(МатӀ. 19:9; Мрк. 10:11-12; ЛкӀ. 16:18)

31 Мадни лагьанва хьи, вуж вичин папахъ галаз чара жезватӀа, къуй ада чара хьунин гьакъиндай чар кхьирай, ахпа чара хьурай. 32 Амма За квез лугьузва: вуж явавал ийизвачир вичин папахъ галаз чара жезватӀа, ада вичин папаз зинавалдай рехъ ачухзава; рахкурнавай паб ни гъайитӀа, гьадани зинавал ийизва.

Кьинекай

33 Дегь чӀавара инсанриз мад лагьай гафарни квез ван хьана: «Кьур кьин чӀурмир, Аллагьдин вилик жуван кьинер кьилиз акъуд» ^d. 34 Амма За квез лугьузва: гьич кьин кьамир: я цаварал кьамир – ам Аллагьдин тахт я; 35 я чилел кьамир – ам Ада кӀвачер эцигдай куьсри я; я Ярусалимдал кьамир – ам чӀехи Пачагьдин шегьер я; 36 я жуван кьилел кьинер кьамир – вавай ви са чӀарни я лацу, я чӀулав ийиз жедач. 37 Амма куь гаф я «эхь», я «ваъ» хьурай. А гафарилай артух гафар хьайитӀа, абур шийирдивай я.

Кьисасдикай

(ЛкӀ. 6:29-30)

38 Инсанриз лагьай гафарикай квез хабар я: «Ви вил акъудайтӀа, вунани вил ахкъуд, свах акъудайтӀа – свах» ^e. 39 Амма За квез лугьузва: ваз шийир авурдалай кьисас къахчумир. Гьадалайни артух яз, ни ви эрчӀи хъвехъ ягъайтӀа, адахъ муькуь хъвехъни элкъуьра. 40 Низ вун дувандиз вугана ви перем къакъудиз кӀан хьайитӀа, адав жуван абани гахце. 41 Ни вун вичихъ галаз са милдин мензилдиз физ мажбурайтӀа, вун адахъ галаз кьве милдин мензилдиз алад. 42 Вавай тӀалабдайдаз це. Вавай бурж къачуз кӀанзавайдахъ далу элкъуьрмир.

Душманар кӀан хьуникай

(ЛкӀ. 6:27-28, 32-36)

43 Инсанриз лагьай гафар квез ван хьана: «Жуван мукьув гвайди кӀан хьухь» ^f, «душманар – такӀан». 44 Амма За квез лугьузва хьи, жуван душманарни кӀан хьухь, куьн хурук кутазвайбурун гьакъиндай дуьа ая. 45 ИкӀ авуртӀа, куьн цавараллай куь Бубадин аялар тирди чир жеда. Ада Вичин ракъинин нурар пис инсанрални хъсанбурал сад хьиз ракъуриз тазва. Гьахъ-михьибурални, гьахъ-михьи туширбурални Ада марфни сад хьиз ракъурзава. 46 Квез куьн кӀандайбур кӀандатӀа, идакай квез вуч суваб жеда? И кар харж кӀватӀдайбуруни ийизва. 47 Куьне салам анжах жуван дустариз гузватӀа, ина кьетӀен вуч кар ава кьван? Мажусийрини гьакӀ ийизвачни? 48 Цавараллай куь Бубадик нукьсан квачирвал, куьнни нукьсан квачиз хьухь.