Mat 26:30-35 | LezIBTNT | STEP | Шукурдин манияр яна, Исани тилмизар Зейтун пелел экъечӀна.

‏ Matthew 26:30-35

Петруди кьил къакъудуникай

(Мрк. 14:26-31; ЛкӀ. 22:33-34; Ягь. 13:37-38)

30 Шукурдин манияр яна, Исани тилмизар Зейтун пелел экъечӀна. 31 Ана Исади тилмизриз лагьана:

– Къе йифиз куьн садни Захъ иман ийиз амукьдач. Каламда кхьенвай «За чубан яна кьейила, суьруьда авай лапагар гьар сад санихъ чкӀида» ^a лугьудай гафар Зи кьилел къведа. 32 Зал чан хтайла, Зун квелайни вилик Галилейдиз атана акъатда.

33 Амма Петруди жаваб яз лагьана:

– Амайбуру вахъ иман ийиз тамукьайтӀани, зун Вахъ иман ийиз амукьда.

34 – За ваз рикӀивай лугьузва: къе йифиз кӀекре гьарайдалди вуна Закай пудра кьил къакъудда, – лагьана Исади.

35 – Вахъ галаз санал рекьидай чкадал атайтӀани, Вакай за са чӀавузни кьил къакъуддач, – лагьана Петруди.

Ихьтин гафар амай тилмизрини лагьанай.