‏

И чар Месигьдихъ иман ийизвай касдиз, вич Каласар шегьердай тир Ифлеманаз кхьенва. Адаз Павела вичин «рикӀ алай амадаг» лугьузва. Адан Энесим тӀвар алай са лукӀ адакай Римдиз катна (и кар а вахтара лап чӀуру тахсиркарвал яз кьазвай). Аквар гьалда, Энесима иесидин кӀвале авай эменнидикайни са вуч ятӀа тухванвай. Адал ана а чӀавуз Римда къазаматда авай Павел гьалтна ва и илчиди ам Месигьдихъ иман авунал гъана. Са кьадар вахтунилай Павела Энесим элкъуьрна Ифлеманан патав рахкурна, адав и чарни вугана. И чарче Ифлеманавай Энесим имандин стха хьиз кьабулун ва адалай гъил къахчун тӀалабзава (Римдин къанунралди иесидиз вичин катнавай лукӀ рекьидай ихтияр авай). Мумкин я, Павелаз Ифлемана Энесим азад хъувуна ва ам Римдиз рахкурна адаз Павелаз къуллугъдай мумкинвал гана кӀанзавай. Павела лукӀвиликай Римдин къанунра авай къайдайрихъ галаз гьуьжетзавач, амма ада иманийрин стхавилин муьгьуьббатдихъ а къанунрилай гзаф важиб авайди къалурзава.

‏ Philemon

Саламар

1 Иса Месигьдихъ иман авунай къазаматда авай Павелан ва гьакӀни ТӀиматӀей стхадин патай чахъ галаз санал са кар ийизвай играми Ифлеманаз, 2Афия вахаз ва чи женгинин юлдаш АрхипӀаз, гьакӀни ви кӀвале кӀватӀ жезвай иманийрин кӀватӀалдиз.

3Аллагьдин, чи Бубадин, ва Ребби Иса Месигьдин патай берекатар ва саламатвал хьурай квез.

Ифлеманан иман ва муьгьуьббат

4За датӀана ви гьакъиндай ийизвай дуьайра Аллагьдиз шукурдин гафар лугьузва, играми Ифлеман, 5вучиз лагьайтӀа вуна Ребби Исадихъ иман авуникай ва Адаз талукь вирибурухъ ви патай авай муьгьуьббатдикай зав ванер агакьзава. 6Вуна къизгъиндаказ масабурухъ галаз пайзавай иманди вун чна Месигьдивай къачузвай вири хъсанвал кьатӀунал гъун паталай за дуьаяр ийизва. 7Ви муьгьуьббатди зун гзаф шадарзава ва заз теселли гузва, гьикӀ лагьайтӀа, я стха, Аллагьдиз талукьбурун рикӀер ваз килигна секин хьанва.

Павела Энесиман гьакъиндай тӀалаб ийизва

8Гьавиляй, завай викӀегьдаказ вуна Иса Месигьдин ТӀварцӀелай ви буржи тамамарун тӀалабиз жезватӀани, 9за муьгьуьббатвиливди икӀ ийизвач. За, Павела, агъсакъалди, Иса Месигьдихъ иман авурвиляй гила къазаматдани тунвайда, 10ина къазаматда авай ва имандал атанвай, вични заз хва хьанвай Энесимаз ▼

▼Энесим – юнан чӀал «Хийир авайди».

регьим авунин гьакъиндай вавай тӀалаб ийизва. 11Виликдай адакай ваз са хийирни авачир жеди, амма исятда ам вазни, зазни гьакъикъатда «Хийир Авайди» я. 12За ам кьулухъди ви патав рахкурзава, и кар зун паталди жуван са пад атӀай мисал я. 13Шад Хабардиз килигна зун тунвай къазаматда, ви чкадал заз куьмек гун патал ам жуван патав тунайтӀа заз гзаф кӀандай. 14Амма ви разивал авачиз заз са затӀни ийиз кӀанзавач. Гьавиляй и кар вуна заз буржи вахгун яз ийизвайди ваъ, хушуналди тамамарзавайди хьун лазим я. 15Ви лукӀ са кьадар вахтунда ви патав хьанач. Мумкин я, ам ви патав эбеди яз хтун паталди икӀ хьана. 16Амма гила ам лукӀралай виневайди яз – играми стха яз хквезва. Ам заз гзаф играми я, ва ам ваз гьам инсан хьиз, гьамни Месигьдихъ иман ийизвайди хьиз, генани артух играми жеда.

17Гьа икӀ, вуна зун ви амадаг яз гьисабзаватӀа, вуна ам зун гьикӀ кьабулдатӀа, гьакӀ кьабул ая. 18Ада са квелди ваз зиян ганатӀа ва я адал ви бурж алатӀа – а бурж зиди яз гьисаба. 19За, Павела, адан вири буржар вахгуда, – лагьана ваз жуван гъилелди кхьизва. Вал жувалди зи бурж хьуникай чун рахадач. 20Эхь, стха, заз Реббидин хатурдай куьмек це ва гьадалди зун Месигьдихъ иман ийизвай стхади хьиз шад ая.

21За ваз вуна неинки зи тӀалабдиз жаваб гудайвилихъ, гьакӀни за тӀалабзавайдалай артухни ийидайвилихъ чӀалахъ яз кхьизва.

22Ахпа мадни зун паталди кӀвал гьазура, вучиз лагьайтӀа куь дуьайриз килигна зун квев вахгудайдак за умуд кутазва.

Саламар ва хийир-дуьаяр

23– 24Иса Месигьдихъ иман авунай гьакӀ къазаматда авай Эпафараса ва захъ галаз санал са кар ийизвайбур тир Марка, АристӀарха, Димаса ва ЛукӀади ваз саламар лугьузва.

25Къуй Ребби Иса Месигьдин берекат квехъ галаз хьурай.