Rev 10 | LezIBTNT | STEP | Заз циф галчукна цавай эвичӀзавай къуват авай са маса малаик акуна. Адан кьилел хважамжам алай. Адан чин рагъ хьиз тир. Адан кӀвачер цӀай кьуна кузвай гулар хьиз аквазвай.

‏ Revelation of John 10

ГъвечӀи ктаб гъилевай малаик

1 Заз циф галчукна цавай эвичӀзавай къуват авай са маса малаик акуна. Адан кьилел хважамжам алай. Адан чин рагъ хьиз тир. Адан кӀвачер цӀай кьуна кузвай гулар хьиз аквазвай. 2 Адан гъиле гъвечӀи ахъа ктаб авай. Ада вичин эрчӀи кӀвач гьуьлел, чапла кӀвачни чилел эцигна. 3 Ада, асланди хьиз, кӀеви ванцелди гьарайна. Адан гьарайдиз цавун ирид къукърумди жаваб хгана. 4 Ирид къукърум рахайла, зун кхьиз гьазур хьана. Амма цаварилай зав са ван агакьна:

– Ирид къукърумди вуч лагьанатӀа жуван къене хуьх, кхьимир.

5 Заз гьуьлени чилел акъвазнаваз акур малаикди эрчӀи гъил цавуз хкажна, 6 цаварни ва цавара вуч аватӀа, чилни ва чилел вуч алатӀа, гьуьлни ва гьуьле вуч аватӀа Вири Халкь Авур Даим Уьмуьр Тухузвайдал кьин кьаз лагьана:

– Вахт атана алукьнава. 7 Ирид лагьай малаикди къаргъу ягъайла, Аллагьди Вичиз къуллугъзавай пайгъамбарриз гайи муштулухра лагьанвайвал, Ада сир кутунвай къаст кьилиз акъатда.

8 Заз цавалай атай ван мад гъилера захъ галаз рахана.

– Алад, – лагьана ада, – фена, гьуьлелни чилел акъвазнавай малаикдин гъилевай ахъа ктаб къачу.

9 Малаикдин патав фена, за лагьана:

– Зав ктаб гице.

– Къачуна, ам неъ, – лагьана ада. – Ам ви руфуна туькьуьл хьайитӀани, ви мецел ам, вирт хьиз, ширин жеда.

10 За малаикдин гъиляй ктаб къачуна тӀуьна. Ам зи мецел, вирт хьиз, ширин тир. Амма зи руфуна ам туькьуьл хьана. 11 И чӀавуз заз лагьана:

– Жуьреба-жуьре чӀаларал рахазвай халкьарин, тайифайрин ва пачагьрин кьилел вуч къведатӀа, къедлай кьулухъ вуна мад пайгъамбарди хьиз лугьуда.