Rev 12 | LezIBTNT | STEP | Цавал са чӀехи кардикай хабар гудай ишара акьалтна. Ам рагъ алукӀнавай папан шикилда авай. Папан кӀвачерик варз квай, адан кьилел цӀикьвед гъед авай таж алай.

‏ Revelation of John 12

Са пабни аждагьан

1 Цавал са чӀехи кардикай хабар гудай ишара акьалтна. Ам рагъ алукӀнавай папан шикилда авай. Папан кӀвачерик варз квай, адан кьилел цӀикьвед гъед авай таж алай. 2 Ам кӀвачел залан тир. Аял хадалди вилик жедай азабди гузвай тӀалдик папа гьарайзавай. 3 Цавал са маса ишарани акьалтна. Ам са чӀехи яру аждагьандин шикилда авай. Аждагьандал ирид кьилни цӀуд карч алай, гьар са кьилел са таж алай. 4 Адан тумуни цавалай гъетерин пудай са пай шутхунна, чилел гадарна. Аждагьан аял хазвай папан вилик акъвазна. Папа аял хунни кумаз аждагьандиз адан таза аял нез кӀанзавай. 5 Папа гада хана. Аялди гъиле ракьун аса кьуна вири халкьарал пачагьвал авуна кӀанзавай. Папан аял Аллагьди Вичин тахтунин патав хутахна. 6 Паб аждагьандикай кьурумдиз катна. Ана Аллагьди адаз чка гьазурнавай. Ана агъзурни кьве вишни пудкъад юкъуз папан къайгъу чӀугун лазим тир.

7 Ахпа цаварал дяве хьана. Мукаила ва адан малаикри аждагьандин аксина гьужумна. Аждагьан ва адан малаикар атӀабурун аксина экъечӀна 8 ва кӀаник акатна. Аждагьан ва адан малаикар цаварилай чукурна. 9 Аждагьан, лагьайтӀа, къадим гъуьлягъ ^{▼▼Иблисди гъуьлягъдин къаматда аваз сифтегьан инсанар рекьелай алуднай.} я. Адаз иблис ва я шейтӀан лугьузва. Ада вири алем алцурарзава. Ам чилел гадарна, адахъ галаз адан малаикарни гадарна. 10 А чӀавуз заз цавай кӀеви ван атана:

– Ингье гила хиласвални атанва.
Аллагьдин гуж гъалиб хьанва. Пачагьвал
чи Аллагьди ийидай чӀав атанва,
алукьнава гьукум Адан Месигьдин.
Аллагьдиз чи стхайрилай-вахарлай
гьам юкъуз, гьам йифиз фитне авурди
гадарнава чилерал. 11 Ва абуру
КӀелен Иви къурбанд яз гуналди
чпин шагьидвилелди
аждагьандал гъалибвал къачуна.
Адаз вафани хуьнин хатурдай,
чпин чанни гуз гьич гьайиф атанач.
12 ГьакӀ хьайила, шад хьухь, цавар ва ана
уьмуьр тухуз авайбур! Эй, алайбур
чилерални гьуьлерал, квез жедайди
гуж я, гуж я, куьз лагьайтӀа куь патав
хъел атанвай вичиз пара писдаказ
иблис агъуз эвичӀнава. Чизава
адаз вичиз тӀимил вахт амайди!

13 Аждагьандиз вич чилел гадарнавайди акурла, ам гада ханвай папан геле къекъвез эгечӀна. 14 Папавай аждагьандин хурукай кьурумдиз вичиз гьазурнавай чкадиз лув гуз жедайвал, адаз чӀехи лекьрен кьве лув гана. Ана Аллагьди са йисуз, кьве йисуз ва зур йисуз папан къайгъу чӀугун лазим тир.

15 Аждагьанди вичин сивяй папан гуьгъуьниз са вацӀ ацӀай кьван яд ахъайна. Адаз паб вацӀу тухвана кӀанзавай. 16 Амма чили папаз куьмек гана. Чили вичин сив ахъайна, аждагьандин сивяй авахьай вацӀ туькьуьнна. 17 Аждагьандиз папакай пара пис хъел атана. Ам папа ханвай маса ксарал, яни Аллагьдин тагькимар хуьз, Иса Месигьдикай шагьидвал ийизвайбурал гьужум ийиз фена. 18 Аждагьан атана гьуьлуьн кьерел акъвазна.