Rev 13 | LezIBTNT | STEP | Заз гьуьлуькай хкечӀзавай ничхир акуна. Адал ирид кьилни цӀуд карч алай. Адан гьар са крчунал са таж алай. Кьилерал тӀварар кхьенвай. А тӀварар аси тӀварар тир.

‏ Revelation of John 13

Гьуьлуькай хкечӀай ничхир

1 Заз гьуьлуькай хкечӀзавай ничхир акуна. Адал ирид кьилни цӀуд карч алай. Адан гьар са крчунал са таж алай. Кьилерал тӀварар кхьенвай. А тӀварар аси тӀварар тир. 2 Заз акур ничхир лекьендиз ухшар тир. Адан кӀвачер севрен кӀвачер хьтинбур, сив асландин сив хьтинди тир. Аждагьанди вичин къуватни тахт ва вичин ихтиярар ничхирдиз гана.

3 Ничхирдин са кьилел гзаф пис хер алай. А хирекай кьил рекьидай хьиз тир. Амма а хер сагъ хъхьана. Ничхирдиз килигзавай чилеллай инсанар мягьтел хьана ва адан гуьгъуьнаваз фена. 4 Абуру, ничхирдиз вири ихтиярар гайивиляй, а аждагьандиз икрам авуна. Абуру ничхирдизни икрам авуна.

– И ничхирдив вуж агакьда? Нивай адахъ галаз женгиниз экъечӀиз жеда? – лагьана абуру. 5 Ничхирдиз дамах гваз Аллагьдикай аси ихтилатар ийиз рахадай сив гана. Адаз вичин кӀвалахар яхцӀурни кьве вацран къене ийидай ихтиярар гана. 6 Ничхир Аллагьдикай, Адан ТӀварцӀикай, Ада уьмуьр тухузвай чкадикай ва цаварал уьмуьр тухузвай вирибурукай аси ихтилатар лугьуз эгечӀна. 7 Адаз Аллагьдиз талукьбурухъ галаз дяве ийидай ва абурал гъалиб жедай ихтияр гана. Адаз жуьреба-жуьре чӀаларал рахазвай тухумрал, халкьарал, ва тайифайрал гьукумвалдай ихтиярни гана. 8 Къурбанддиз акъуднавай КӀелев гвай, дуьнья халкь тахьанмаз авай уьмуьрдин ктабда тӀварар гьат тавунвайбуру ничхирдиз икрам авуна.

9 Нихъ япар аватӀа, гьадаз ван атурай.

10 Есирвал нин кьисмет ятӀа,
есирвилиз аватда ам.
Туруник кьин кьисмет тирди,
тур галукьна рекьида ам.
И береда лап сифте яз герекди
Аллагьдиз талукьбурухъ хьунухь я
ихтибарни, сабурни.

Чиликай хкечӀай ничхир

11 Ахпа заз маса ничхир акуна. Ам чиликай хкечӀзавай. Адал кӀелен хьтин кьве карч алай. Адан ван аждагьандин ван хьтинди тир. 12 И ничхирдизни гьа сифтегьан ничхирдиз ганвай хьтин вири ихтиярар авай. Ада вичин крарни гьа сифтегьандан вилик ийизвай. Ада вири дуьньяда авайбур гзаф пис хер сагъ хъхьай сифтегьан ничхирдиз икрам авуниз мажбурзавай. 13 – 14 Адаз сифтегьан ничхирдин вилик аламатар къалурдай ихтияр ганвай. Ада чӀехи керемат-ишараяр ийизвай. Ада, инсанриз аквадайвал, гьатта цаварилай чилерал цӀайни къурзавай. Ихьтин керемат-ишарайралди кьвед лагьай ничхирди инсанар алцурарзавай. Ада чилел алайбуруз хер сагъ хъхьай ничхирдин къамат-кӀалуб расна гьазур ая лугьузвай. 15 Адаз сад лагьай ничхирдин кӀалубдал чан гъидай къуват гана ва ада кӀалубдал чанни гъана. И кӀалубдивай гьатта рахазни жедай. Кьвед лагьай ничхирди а кӀалубди вичиз икрам тавурбур ягъиз рекьидайвални авунай. 16 Кьвед лагьай ничхирди гъвечӀибурун ва чӀехибурун, девлет авайбурун ва саилрин, азадбурун ва лукӀарин виридан эрчӀи гъилел ва я пелел тагъма гьалчдайвал авуна. 17 ГьакӀни и тагъма, яни ничхирдин тӀвар ва я адан тӀварцӀин рекъем, алайбурулай гъейри мад садазни са затӀ маса къачудай, я маса гудай ихтияр ганач.

18 Инал акьул-камал герек я. Низ акьул аватӀа, къуй ада ничхирдин рекъемдин мана чир авурай. А рекъемди виче инсандин тӀвар чуьнуьхнава. Адан рекъем ругуд вишни пудкъанни ругуд я.