Rev 16 | LezIBTNT | STEP | Заз Ибадатханадай къвезвай кӀеви ван атана. – Алад, – лагьана ванци ирид малаикдиз, – фена, Аллагьдин хъилев ацӀанвай ирид сукӀра чилел ичӀира.

‏ Revelation of John 16

Аллагьдин хъилев ацӀанвай ирид сукӀра

1 Заз Ибадатханадай къвезвай кӀеви ван атана.

– Алад, – лагьана ванци ирид малаикдиз, – фена, Аллагьдин хъилев ацӀанвай ирид сукӀра чилел ичӀира.

2 Сад лагьай малаикди фена вичин сукӀра чилел ичӀирна. Ничхирдиз ва адан кӀалубриз икрамзавай инсанрал гзаф пис, ирин авай хирер хьана.

3 Кьвед лагьай малаикди вичин сукӀра гьуьлуьз ичӀирна. Гьуьлуькай мейитдин ивидиз ухшар иви хьана. Гьуьле авай кьван чан алай затӀар вири кьена.

4 Пуд лагьай малаикди вичин сукӀра вацӀаризни булахриз ичӀирна. ВацӀарикайни булахрикай иви хьана. 5 Заз ятар хуьзвай малаикдин ван атана:

– ДатӀана авай, хьайи ва пак Ребби, Вун гьахъ-михьи я, вучиз лагьайтӀа Вуна авур дуван адалат галайди я. 6 Инсанри Аллагьдиз талукьбурунни пайгъамбаррин иви гьикӀ авадарнатӀа, Вуна гьа инсанрив иви хъвазни туна. Абур иви хъваз туниз лайих я.

7 Ахпа заз къурбангандин патавай къвезвай са ван атана:

– Эхь, Ребби Аллагь, вири дуьньядин Агъа, вуна ийизвай дуванар дуьзбур ва гьахъ-михьибур я.

8 Кьуд лагьай малаикди вичин сукӀра ракъинал ичӀирна. Ракъиниз инсанар кудай ихтияр гана. 9 Зурба зегьемди инсанар алугарна. Абуру и завалар гъиле авай Аллагьдиз экъуьгъунар авуна. Инсанар Аллагьдин рекьел атанач ва Адаз шукур авунач.

10 Вад лагьай малаикди вичин сукӀра ничхирдин тахтунал ичӀирна. Ничхирдин вилаятда мичӀи хьана. Азабрик акатай инсанри чпин мецер кӀасзавай. 11 Абуру чпиз азабарни завалар гана лугьуз цаварин Аллагьдиз экъуьгъунар авуна. Инсанри чпин пис крар акъвазарнач.

12 Ругуд лагьай малаикди вичин сукӀра чӀехи Эфрат вацӀуз ичӀирна. ВацӀ кьурана. Рагъ экъечӀдай патай къведай пачагьриз рехъ ачух хьана. 13 Заз аждагьандин, ничхирдин ва тапан пайгъамбардин гьар садан сивяй са чиркин руьгь экъечӀзавайди акуна. Абур пудни хъипериз ухшар тир. 14 Абур чӀуру жинерин руьгьер тир. А руьгьери керемат-ишараяр къалурзавай. Абур алемда авай вири пачагьрин патав, са чӀехи юкъуз а пачагьар вири дуьньядин Агъа тир Аллагьдихъ галаз ийидай дяведиз къарагъарун патал, физвай.

15 Реббиди лугьузва:

– Ингье, Зун чинебан угъри хьиз къвезва. ДатӀана уях ва вичин парталар хуьзвай кас бахтавар я. Ам кьецӀилдиз къекъведач. Адан айиб инсанриз аквадач.

16 ЧӀуру жинерин руьгьери пачагьар вичиз чувуд чӀалалди Гьармагеддан лугьудай чкадиз кӀватӀна.

17 Ирид лагьай малаикди вичин сукӀра гьавадиз ичӀирна. Ибадатханада авай тахтунин патавай кӀеви ван атана:

– АкьалтӀна!

18 ЦӀайлапанар яна, цавари къукърумарна, гьарай-эвер акъатна. Чилел зурба залзала хьана. Ихьтин залзала чилел инсанар халкь авурдалай инихъ хьайиди тушир. Гьахьтин зурба залзала тир! 19 ЧӀехи шегьер пуд чкадал пай хьана. Халкьарин шегьерар чкӀана. ЧӀехи Бабил шегьерни Аллагьдин рикӀелай алатнач. Гьа шегьердивни Аллагьди хъилин туьнт чехирдив ацӀанвай сукӀра хъваз туна. 20 Гьуьлел алай гьар са къурамат квахьна. Чилел дагъларни амукьнач. 21 Инсанрин кьилел цаварай чӀехи къванерин хар къвана. Завалар хьана лугьуз инсанри Аллагьдиз экъуьгъунар авуна, вучиз лагьайтӀа хару гъайи завалар гзаф заланбур тир.