‏ Revelation of John 18

Бабил барбатӀ хьун

1Ахпа заз цавай эвичӀзавай маса малаик акуна. Адан гъиле чӀехи ихтияр авай. Адан баркаллади чил экуь авунвай. 2Ада лап кӀеви ванцелди гьарайна:

– БарбатӀ хьана, барбатӀ хьана, Бабил, вун,
чӀехи ченги, чӀехи шегьер Бабил, вун.
Адакай кӀвал хьана чӀуру жинеррин,
макан хьана чиркинвал гвай руьгьерин,
адакай муг хьана чиркин къушарин.
3 Адав хьайи явавилин туьнт чехир
хъванай вири и дуьньядин халкьари.
Адахъ галаз санал чилин пачагьри
зинавилер, явавилер авунай.
Ада вичин ацӀайвилив, абурдив
савдагаррин мални девлет артухнай.

4 Заз цавай маса ван атана: – И шегьердай экъечӀ, зи халкь! Акъвазмир!
Пай кутамир адан чӀехи гунагьрик.
И шегьердиз хьайи гуж квез тахьурай.
5 И шегьердин гунагьрин дагъ цавариз
хкаж хьанвай. Адан вири тахсирар
рикӀеллама чи Реббидин, Аллагьдин.
6 Вуч писвал квез авунатӀа шегьерди,
куьнени гьам хъия кьве къат алазни.
Ада квез туьнт чехир цайи сукӀрада
куьне хцуз кьведра туьнтди гьадлайни.
7 Гьикьван машгьур авунайтӀа ада вич,
мал-девлетдин юкьва чӀугваз кефият,
гьакьван адаз гъам-хажалат, азаб це.
Лугьузва гьа ада вичин рикӀяйни:
«Зун пачагь я ацукьнавай тахтуна,
хендеда туш, са дертни-гъам жедач заз».
8 Гьахьняй са къуз адав жаза агакьда,
адан ажал къведа, адан йикь жеда,
адаз шел-хвал жеда, каша гьатда ам,
цӀа гьатна ам куда, вучиз лагьайтӀа
къуват ава Ребби Аллагьдихъ, дуван гвай.

9Ам кузвай цӀун гум акурла, адахъ галаз санал явавилер ва ацӀайвилер-чӀагайвилер авур чилин пачагьар рикӀ къекъягьиз адахъ шехьда. 10Адаз жезвай азабрикай кичӀела чилин пачагьри, яргъал акъвазна, лугьуда:

– Гуж я, гуж я ваз хьанвайди, чӀехи шегьер, мягькем шегьер Бабил, куьз лагьайтӀа са сятдин къене вав ви жаза агакьна.

11Чилин савдагарар чпив гвай метягь садани маса къахчун тийизмайвиляй рикӀ къекъягьиз шехьда. 12Абурув гвай метягь, лагьайтӀа, къизилдинни гимишдин затӀар, багьа къашарни мержанар, назназиярни багьа яру парчаяр, атӀласарни хараяр, атир галай кӀарасрикайни магьидикай, багьа кӀарасрикайни буьруьнждикай, ракьукайни мармардикай раснавай затӀар, 13надир ▼

▼Надир – лап кьериз, тек-туьк гьалтдай затӀ.

дадни атир галай жуьреба-жуьре векьер-кьаларни, чехирарни чӀемер, гъуьрни къуьл, маларни лапагар, шиверни фургъунар, лукӀар ва маса инсанар тир. 14Савдагарри шегьердиз лугьуда:

– Ви руьгьдиз кӀани бегьерар вав гумукьнач. ЦӀарцӀар гудай вири багьа шейэр вавай къакъатна. Ваз мад абур жагъин хъийидач.

15И шегьердихъ галаз гуз-къачунин савда авуналди девлет артух хьайи савдагарар шегьердик акатнавай цӀукай кичӀела яргъа акъвазда ва рикӀ къекъягьиз шехьда.

16– Гуж я, гуж я ваз хьанвайди, чӀехи шегьер! – лугьуда абуру. – Назназиярни, багьа яру парчаярни хараяр галчукнавай, къизилдалди, багьа къашаралдини мержанралди чӀагурнавай ▼

▼ЧӀагурун – иер авун.

шегьер! 17Ихьтин девлетар са сятдин къене терг хьана. Гимичийрин кьилевайбуру, гимичийри, гимида аваз сиягьат ийизвайбуру ва гьуьлелай хийир къачузвай вирибуру яргъа акъвазна, 18шегьердик акатнавай цӀуз килигиз, цӀугъ ийиз лагьана:

– И чӀехи шегьер хьтин шегьер мад авайтӀа яраб?

19Абуру чпин кьилерал руьхъ кӀвахна ва цӀугъ ийиз шелар авуна:

– Гуж я, гуж я ваз хьанвайди, чӀехи шегьер! Гимияр авайбурни гьуьлуькай хийир хкудзавайбур тир виридаз девлетар гайи шегьер! Вун са сятда ичӀи хьана.

20И кардал шад хьухь, цавар, илчиярни пайгъамбарар ва Аллагьдиз талукь тир амайбур. Шегьерди квез вуч авунатӀа, гьадай Аллагьдини шегьердиз жаза гана.

21Къуват авай са малаикди регъуьн къван хьтин са къван къачуна гьуьлуьз гадарна ва лагьана:

– Вун гьа ихьтин йигинвилив, эй Бабил,
барбатӀ жеда, мад вун хкаж хъжедач.
22 Ягъиз арфаяр, кфилар, къаргъуяр,
хуш манияр лугьузвай шад ксарин
ванер-сесер хкведач ваз садрани.
Садрани вахъ мад устӀарар хъжедач.
Ви куьчейрай регъуьн къванер элкъведай
ван хкведач. 23Ви къене мад, эй Бабил,
гьич садрани чирагърин экв куьхкӀуьдач.
Я мехъерин ванерни ваз хкведач,
куьз лагьайтӀа и дуьньядин кьуд пата
ви тажирар виридалай зурба тир.
Халкьар рекьяй акъудна ви суьгьуьрди,
24 пайгъамбаррин, Аллагьдиз талукьбурун,
гьакӀни чилел яна кьейи ксарин
вирибурун ивияр вай жагъана.