Rev 19 | LezIBTNT | STEP | Ахпа заз са гзаф инсанар рахазвай хьтин кӀеви ван атана: – Гьалелуя ! Тариф ая Реббидин! Баркалла алай ва къудрат авай чи Реббиди хиласна чун.

‏ Revelation of John 19

Цаварал шадвилер

1 Ахпа заз са гзаф инсанар рахазвай хьтин кӀеви ван атана:

– Гьалелуя ^{▼▼ Гьалелуя – чувуд чӀалалди «Аллагьдиз шукур хьурай» лагьай чӀал я.} ! Тариф ая Реббидин!
Баркалла алай ва къудрат авай чи Реббиди
хиласна чун. 2 ГьакӀни адан дуванар
гьахъ-михьибур я, дуьзбур я.
Ада чӀехи ченгидизни кар кьунай –
а ченгиди вичин явавилелди
чӀуру рекье турвиляй чил ва ада
гьакӀ Реббидин лукӀаринни ивияр
авурвиляй экъич. Гьахьняй Реббиди
ченгидилай михьиз кьисас къахчуна.

3 Ванци кьвед лагьай гъилера «Гьалелуя» лагьана. Ченги кузвай цӀун гум даим яз цавуз хкаж хьана. 4 Гьа чӀавуз къанникьуд агъсакъалдини чан алай кьуд затӀуни, метӀерал акъвазна, тахтунал ацукьнавай Аллагьдиз икрамна ва лагьана:

– Амин! Гьалелуя!

5 Тахтунин патавай ван акъатна:

– Аллагьдихъай кичӀе лукӀари,
гъвечӀибуруни, чӀехибуруни
вирида чи Аллагьдин тарифар ая!

6 Ахпа заз са гзаф инсанар рахазвай хьтин, чӀехи селдин хьтин, къуват авай къукърумрин хьтин ван атана:

– Гьалелуя! Тариф ая Реббидин!
Чи Ребби Аллагьди
вири дуьньядин Агъади,
пачагьвал ийир вахт алукьнава.
7 Ша чна шадвал, хвешивал ийин!
Ребби Аллагьдин тарифар ийин!
КӀелен мехъерни жезва мукьвара,
Адан сусани ^{▼▼ «Свас» Аллагьдиз талукь инсанрикай метафора яз лагьанва. Инал а гаф иманийрин кӀватӀал фикирда аваз лагьанва. Гуьгъуьнлай Аллагьдин халкьдин уьмуьр тухузвай ЦӀийи Ярусалим шегьердизни «свас» лугьуьз хьана.} вич гьазурнава.
8 Ингье сусахъни галчук авунва
михьи ва экуь назнази дуьгуьр.

Назнази, лагьайтӀа, Месигьдиз талукьбурун гьахъ-михьивилин лишан я.

9 Заз малаикди лагьана:

– Кхьихь: КӀелен мехъерик эвернавайбур бахтавар я.

Ахпа малаикди заз хълагьна:

– Ибур Аллагьдин халисан гафар я.

10 Зун адаз икрам авун патал адан кӀвачерив ярх хьана. Амма ада лагьана:

– Килиг гьа, заз икрам ийимир. Зани, гьа вуна хьиз ва Исади гайи Шад Хабардикай шагьидвал авур ви стхайри-вахари хьиз, Аллагьдиз къуллугъзава. Аллагьдиз икрам ая. Исади ачухай гьакъикъатди пайгъамбаррик руьгь кутазва.

Месигьдин гъалибвал

11 Ингье, заз ахъа хьанвай цавай лацу шив акуна. Мияхдин тӀвар Вафа гвайди ва Халисанди тир. Ада тухузвай дяведа адалат хуьзва. Ада ийизвай дуванни гьахъ-михьиди я. 12 Адан вилер куькӀвена кузвай цӀай хьиз тир. Адан кьилел гзаф тажар алай. Адал тӀвар кхьенвай. А тӀвар са Гьадалай Вичелай гъейри садазни чизвачир. 13 Адан парталар михьиз ивидай хьанвай. Адан тӀвар «Аллагьдин Гаф» тир.

14 Адан гуьгъуьна лацу шивераллай малаикрин кьушун къвезвай. Малаикрал лацу ва михьи назназияр алай. 15 Мияхдин сивяй халкьар терг авун патал хци тур акъатзавай. Ада халкьар ракьун чумахъдалди хуьда. Ада вири дуьньядин Агъа тир Аллагьдин хъиленни гъазабдин чехир хкудзавай къванцик акатай инсанрал кӀвач илисзавай. 16 Адан ятур кӀевзавай парталдин ценцел тӀвар кхьенвай: пачагьрин Пачагь, агъайрин Агъа.

Ничхирдин ва тапан пайгъамбардин эхир

17 Заз ракъинал акъвазнавай са малаик акуна. Ада кӀеви ванцелди цавун кьакьанра лув гузвай къушариз лагьана:

– Ша, Аллагьдин чӀехи межлисдиз кӀватӀ хьухь. 18 Ана пачагьрин мейитар, къуват авайбурун мейитар, кьушунрин кьилевайбурун мейитар, шиверинни абурал ацукьнавайбурун мейитар, вири уьзденрин ва лукӀарин мейитар, гъвечӀибурун ва чӀехибурун мейитар неъ.

19 Заз ничхирни чилин пачагьар ва абурун кьушунар акуна. Абур Мияхдихъ галаз ва адан кьушундихъ галаз дяве авун патал гьазур хьанвай. 20 Ничхирни тапан пайгъамбар кьведни санал кьуна. И тапан пайгъамбарди ничхирдин вилик керемат-ишараяр къалурзавай. Ада и аламатралди чпел ничхирдин тагъма алаз адан кӀалубдиз икрамзавай инсанар алцурнай. Ничхирни тапан пайгъамбар кьведни чан аламаз цӀай кьуна кузвай гугурт авай вириз гадарна. 21 Амайбур Мияхдин сивяй акъатзавай турунив яна кьена. Кьейибурун мейитар тӀуьна вири къушар тух хьана.