Rev 2 | LezIBTNT | STEP | Эфес шегьерда авай иманийрин кӀватӀалдин малаикдиз кхьихь: «ЭрчӀи гъиле ирид гъед кьуна ирид чирагъгандин юкьва аваз Къекъвезвайда ваз икӀ лугьузва:

‏ Revelation of John 2

Эфесда авай кӀватӀалдиз чар

1 Эфес шегьерда авай иманийрин кӀватӀалдин малаикдиз кхьихь: «ЭрчӀи гъиле ирид гъед кьуна ирид чирагъгандин юкьва аваз Къекъвезвайда ваз икӀ лугьузва:

2 – Куь крар, куь зегьметар, куь сабур Заз чизва. Квевай чӀуру рекье авайбур эх тежедайдини Заз чида. Куьне „Чун илчияр я“лугьуз, чеб илчияр туширбур синагъ авурла, абур квез тапархъанар яз жагъанай. 3 Куьне гзаф четинвилер эхна, куьне сабур хвена. Заз килигна куьне гзаф азиятар чӀугунатӀани, куьн къуватдай аватнач. Вири и крарни Заз чида. 4 Амма са карда Зун квелай рази туш: гила квез Зун сифтедай хьиз кӀанзамач. 5 Куьне куьн чӀуру тахьанмаз гьихьтинбур тиртӀа рикӀел хкваш. Туба ая, куьне эвелдай авур хьтин крар ая. Тийиз хьайитӀа, и Зун куь патав къведа ва куь чирагъган алай чкадилай алудда. 6 Авайвал лагьайтӀа, куь хъсанвал ам я хьи, Заз такӀандай НикӀалан ^{▼▼Никал – Месигь Исадин тагькимар чӀурзавай инсанрин са кӀеретӀдин кьиле хьайи кас.} терефдаррин крар квезни такӀанда. 7 Руьгьди иманийрин кӀватӀалриз вуч лугьузватӀа, япар авайбуруз ван атурай: Аллагьдин женнетдин юкьвал алай уьмуьрдин тарцин бегьерар За Аллагьдиз акси крарал гъалибвал къачудай гьар садав нез тада!»

Симуьрнеда авай кӀватӀалдиз чар

8 Симуьрне шегьерда авай иманийрин кӀватӀалдин малаикдизни кхьихь: «Эвелдай кьена, гила, ингье, чан хтанвай Сифтегьанда ва Эхиримжида икӀ лугьузва:

9 – Заз квехъ дерт-гъам авайди, куьн кесиб тирди чизва. Авайвал лагьайтӀа, квехъ девлет ава. Чпи чпикай „Чун чувудар я“лугьудайбуру квекай чӀурукӀа ийизвай ихтилатарни Заз чида. Амма абур халисан чувудар туш, абур иблисдин межлисдиз кӀватӀ хьанвайбур я. 10 Куьне эхна кӀанзавай крарикай квез кичӀе жемир. Чир хьухь, куьн синагъ авун патал иблисди куь арадай са шумуд кас къазаматдиз вегьида. Са цӀуд юкъуз квез гъам-хажалат жеда. Рекьидалди Заз вафа хуьх, За квез эбеди уьмуьрдин таж гуда.

11 Руьгьди иманийрин кӀватӀалриз вуч лугьузватӀа, япар авайбуруз ван атурай: кьвед лагьай гъилера кьиникьикай Аллагьдиз акси крарал гъалибвал къачудай са касдизни зиян жедач».

Пергамда авай кӀватӀалдиз чар

12 Пергам шегьерда авай иманийрин кӀватӀалдин малаикдизни кхьихь: «Кьве патайни хци тия авай тур гвайда икӀ лугьузва:

13 – Куьне иблисдин тахт ^{▼▼Иблисдин тахт – Пергам бутризни Римдин пачагьриз икрамзавай меркез шегьер тир.} авай чкада уьмуьр тухузвайди Заз чизва. ГьакӀ ятӀани, куьн Заз мукьва яз ама. Иблис авай куь маканда Зи паталай вафа гваз шагьидвал авур АнтипӀ яна кьейи йикъарани куьне Закай кьил къакъуднач. И карни Заз чизва. 14 Амма Зун квелай са бязи крара рази туш – ана квехъ Билъаман несигьатрал амалзавайбур ава: Билъама, лагьайтӀа, къадим вахтара Балакьав Исраилдин халкь рекьяй акъудиз туна. Абуруз бутриз авунвай къурбандар нез ва явавилер ийиз чирна. 15 Квехъни НикӀалан терефдаррин тарсар кьазвайбур ава. 16 Ша, куьне туба ая, гунагькарар жемир, тахьайтӀа, и мукьвара Зун куь патав къведа ва Зи мецин туруналди Зи Гафар чӀурзавайбурухъ галаз дяведиз экъечӀда.

17 Руьгьди иманийрин кӀватӀалриз вуч лугьузватӀа, япар авайбуруз ван атурай: Аллагьдиз акси крарал гъалибвал къачудайдав За сир квай мангьудин дад акваз тада ва адаз За лацу къван багъишда. Къванцел садазни течидай цӀийи тӀвар кхьенваз жеда. Ам нин тӀвар ятӀа, анжах гьа къван гьатайдаз чир жеда».

Туьатирада авай кӀватӀалдиз чар

18 Туьатира шегьерда авай иманийрин кӀватӀалдин малаикдизни кхьихь: «Кузвай цукӀвар хьтин вилер ва цӀарцӀар гузвай лацу буьруьнждиз ухшар кӀвачер авай Аллагьдин Хци икӀ лугьузва:

19 – Куь крар, куьне Заз къалурзавай куь муьгьуьббат, куьне Заз ийизвай къуллугъ, куьне Захъ ийизвай иман ва куь сабур Заз чизва. Куьне эхиримжи вахтара ийизвай крар зурба тирдини Заз чизва. Сифтедай Зи иман кьуна куьне авур крар акьван чӀехибур тушир.

20 Амма Зун квелай рази туш: Язебел лугьудай са папа вич Аллагьдин мецелай рахазва лугьузва, Зи лукӀариз тапан несигьатар гузва, абур рекьяй акъудзава, абурув явавилер ийиз ва бутриз авунвай къурбандар нез тазва. Вуна лагьайтӀа, а папаз рехъ гузва. 21 За а папаз Аллагьдин рекьел атун патал вахт гана, амма адаз вичин рекьелай Аллагьдин рекьел къвез кӀанзавач. 22 Ингье За ам месиз язава. Адахъ галаз зинавал авурбуруни туба тавуртӀа, За гьабурузни чӀехи бедбахтвал ракъурда. 23 За а папан пата авайбурувни ажал агакьарда. Гьа чӀавуз иманийрин вири кӀватӀалар Заз инсанрин рикӀерни абурун фикирар аквазвайди тирдан гъавурда Зун акьада. За гьар садав вичи авур крарин гьахъ агакьарда. 24 Куьне, Туьатирада авай муькуьбуру, а папа гузвай несигьатрал амал ийизвач. Иблисдин крарин тапан деринвилерни квез чизвач. Гьавиляй За квез лугьузва: За куьн мад кӀевера твадач. 25 Анжах квехъ авай иман Зун къведалди кӀевиз яхъ.

26 Эхирдалди Зи къастунал амал авуна, иблисдал гъалибвилер къачудайбурув За халкьарин винел чӀехивал ийиз тада. 27 Абуру халкьарал ракьун чумахъ гъиле аваз агъавал ийида. Халкьар хъенчӀин къапар хьиз кӀус-кӀус жеда. 28 Зи Бубадин патай гьукум Зи Гъилени гьакӀ гьатайди я. Гъалиб жедайдаз За экуьнин гъедни гуда.

29 Руьгьди иманийрин кӀватӀалриз вуч лугьузватӀа, япар авайбуруз ван атурай».