Rev 21 | LezIBTNT | STEP | Заз цӀийи цавни цӀийи чил акуна. Сад лагьай цавни сад лагьай чил квахьнавай, я гьуьлни амачир.

‏ Revelation of John 21

ЦӀийи цавни цӀийи чил арадал гъун

1 Заз цӀийи цавни цӀийи чил акуна. Сад лагьай цавни сад лагьай чил квахьнавай, я гьуьлни амачир. 2 Заз пак шегьер Ярусалим акуна, Аллагьдин патавай цаварай эвичӀзавай цӀийи Ярусалим. Ам чам патал чӀагурна ^{▼▼ЧӀагурун – иер авун.} гьазурнавай свас хьиз авай. 3 Заз тахтунихъай къвезвай кӀеви ван атана:

– Ингье Аллагьдин чардах, гила ам инсанрив гва. Аллагьди инсанрихъ галаз уьмуьр тухуда. Абурукай – Аллагьдин халкь, Аллагьдикайни абурун Аллагь жеда. Аллагь Вични инсанрихъ галаз жеда. 4 Аллагьди инсанрин вилерай атай гьар са нагъв михьда. Мад я ажал, я шел, я цӀугъ, я азар хъжедач, вучиз лагьайтӀа виликдай хьайи кьван крар алатна фенва.

5 Тахтунал Ацукьнавайда лагьана:

– Ингье За вири цӀийиз халкьзава.

Ахпа Ада заз лагьана:

– И гафар кхьихь. Абур гьахъбур ва дуьзбур я.

6 – АкьалтӀна! – давамарна Ада. – Зун Алфани Омега я, Зун Эвелни Эхир я. Цихъ къанихдаз За уьмуьр гудай булахдай яд гьавая гуда.

7 Закай Аллагьдиз акси крарал гъалибвал къачудай гьар касдин Аллагь жеда, а касдикайни Зи хва жеда. 8 КичӀерхъанарни хаинар, мурдарбурни ивикъичар ^{▼▼Ивикъич – инсан яна кьейи кас.}, явабурни суьгьуьрчияр, бутпересарни вири тапархъанар цӀайни гугурт авай вириз аватда. И вир кьвед лагьай ажал я.

9 Ирид завалдив ацӀанвай ирид сукӀра гвай ирид малаикдикай сад зи патав атана.

– Ша, за ваз КӀелен свас къалурда, – лагьана ада.

10 Зак Пак Руьгь акатна. Малаикди зун чӀехи ва кьакьан дагъдиз хкажна. Заз цаварай Аллагьдин патавай чилел эвичӀзавай пак Ярусалим шегьер къалурна. 11 Шегьердал алай Аллагьдин баркаллади нур гузвай. Адан нур буьлуьлди ^{▼▼Буьлуьл – вини дережадин ери авай шуьше, хрусталь.} хьиз цӀарцӀар гузвай яспис лугьудай багьа къаш хьиз аквазвай. 12 Адахъ чӀехи ва кьакьан пару галай, паруда цӀикьвед вар авай, гьар са варцел са малаик акъвазнавай. Варарал Исраилдин рухвайрин цӀикьвед тайифадин тӀварар кхьенвай. 13 РагъэкъечӀдай патахъай пуд вар, кефер патахъай пуд вар, кьибле патахъай пуд вар, рагъакӀидай патахъай пуд вар авай. 14 Шегьердин пару цӀикьвед дибдал акъвазнавай, абурал КӀелен цӀикьвед илчидин тӀварар кхьенвай.

15 Захъ галаз рахай малаикдив шегьер, варар ва пару алцумун патал къизилдин лаш гвай. 16 Шегьердихъ кьуд пӀипӀ авай. Адан кьуд цлан яргъивални сад тир. Малаикди лашуналди шегьер алцумайла, цӀикьвед агъзур истад хьана. Шегьердин яргъивал, гьяркьуьвал ва кьакьанвал сад тир. 17 Шегьердин парудин кьакьанвал алцумайла, вишни яхцӀурни кьуд кьуьнт акъатна. Кьуьнт инсандин уьлчме тир. Малаикди инсанрин уьлчмейрал алцумзавай. 18 Шегьердин пару ясписдикай эцигнавай. Шегьер михьи къизилдикай тир, ада буьлуьлди хьиз нур гузвай. 19 Шегьердин цлан дибар багьа къашаралди чӀагурнавай ^{▼▼ЧӀагурун – иер авун.}. Сад лагьай диб – къацу ясписдикай, кьвед лагьайди вили сафирдикай, пуд лагьайди – яру гьакьекьдикай, кьуд лагьайди экуь-къацу зумруддикай, 20 вад лагьайди яру-махъу униксдикай, ругуд лагьайди – туракь сердаликдикай, ирид лагьайди яру хирзалитдикай, муьжуьд лагьайди къацу-вили бериллдикай, кӀуьд лагьайди рекӀвеба-хъипи тапаздикай, цӀуд лагьайди къацу-къизилверекь хризапраздикай, цӀусад лагьайди икьи-яру лалдикай, цӀикьвед лагьайди фичӀи-яру аметистдикай тир. 21 Гьар са вар чӀехи сагъ мержандикай авунвай. Шегьердин куьчеяр михьи къизилдикай тир, абуру, буьлуьлди хьиз, нур гузвай.

22 Заз шегьерда Аллагьдин КӀвал акунач. Адан КӀвал вири дуьньядин Агъа тир Ребби Аллагь ва КӀел я. 23 Шегьер экуь авун патал я рагъ, я варз герек туш. Ам Аллагьдин баркаллади экуь ийизва. КӀел шегьердиз экв гузвай чирагъ я. 24 Вири халкьари шегьердай къвезвай экуьник уьмуьр тухуда. Чилин пачагьри шегьердиз чпин хазинаяр гъида. 25 Югъди адан варар ахъаз амукьда ва агалдач, вучиз лагьайтӀа ана йиф стӀунни жедач. 26 Халкьари шегьердиз рекӀв ва девлетар гъида. 27 Шегьердиз чиркинвал квай са затӀни гьахьдач, я аниз табвал квай ва чиркин са касни гьахьдач. Аниз анжах КӀелев гвай уьмуьрдин ктабда тӀварар кхьенвайбур гьахьда.