Rev 22 | LezIBTNT | STEP | Ахпа заз малаикди Аллагьдин ва КӀелен тахтунин патавай къвезвай михьи вацӀ къалурна. ВацӀа уьмуьр гудай яд авай. Ам алцифна ваз, экв алаз, буьлуьл хьиз, аквазвай.

‏ Revelation of John 22

1 Ахпа заз малаикди Аллагьдин ва КӀелен тахтунин патавай къвезвай михьи вацӀ къалурна. ВацӀа уьмуьр гудай яд авай. Ам алцифна ваз, экв алаз, буьлуьл ^{▼▼Буьлуьл – вини дережадин ери авай шуьше, хрусталь.} хьиз, аквазвай. 2 И вацӀ шегьердин кьилин куьчедин юкьвай авахьзавай. ВацӀун кьве патани уьмуьр гудай майваяр гъизвай тарар экъечӀнавай. А тарар цӀикьведра майваяр гъидайбур тир. Абуру гьар вацра бегьерар гъизвай. Тарарин пешер вири халкьар дири хъувун патал тир. 3 Шегьерда мад Аллагьдин лянет алай са затӀни хъжедач. Ана Аллагьдинни КӀелен тахт жеда. Аллагьдин лукӀари Адаз ибадат ийида. 4 Абуруз Аллагьдин чин аквада. Абурун пелерал Аллагьдин ТӀвар кхьенвай. 5 Ана мад йиф хъжедач. Абуруз мад я чирагъ, я ракъинин экв герек жедач. Абуруз экв Ребби Аллагьди гуда, абуру даим яз пачагьвал ийида. 6 Малаикди заз лагьана:

– И гафар гьахъбур ва дуьзбур я. Пайгъамбаррин руьгь идара ийизвай Аллагьди Вичин лукӀариз и мукьвал вахтара вуч жедатӀа къалурун патал малаик ракъурна.

Иса Месигь хтун

7 Исади лагьана:

– Килиг гьа, Зун гьа и мукьвара хкведа. И ктабда лагьанвай пайгъамбарвилин гафарал амал ийидайбур бахтавар я.

8 Зун, Ягья, и кар акурди ва ван хьайиди я. И кар акурла ва ван хьайила, заз и крар къалурай малаикдин вилик зун адаз икрам авун патал адан кӀвачерив ярх хьана. 9 Амма ада лагьана:

– Килиг гьа, заз икрам ийимир. Зани, гьа вуна хьиз, ви стхаяр тир пайгъамбарри хьиз, и ктабда лагьанвай гафарал амал ийизвай ксари хьиз, Аллагьдиз къуллугъзава. Аллагьдиз икрам ая.

10 Ахпа ада заз лагьана:

– И ктабда лагьанвай пайгъамбарвилин гафар инсанрикай чуьнуьхмир. Вахт мукьвал хьанва. 11 Пис крар ийизвай ксари къуй чпин крар давамаррай. Мердимазарри къуй чиркинвилер авурай. Гьахъ-михьи ксари мадни гьахъ-михьивилер авурай. Аллагьдиз талукьбур мадни Адаз талукь яз амукьрай.

12 Реббиди лагьана:

– Ингье, гьа и мукьвара Зун хкведа. За гьар са касдив вичи авур крарин гьакъи ахгакьарда. 13 Зун Алфани Омега я. Зун Эвелни Эхир я.

14 Аллагьдин тагькимрал амал ийиз чпин михьивилер ийизвай ксар бахтавар я. Абуруз шегьердин варарай аниз гьахьна уьмуьр гудай тарцелай бегьерар недай ихтияр жеда. 15 Мердимазарарни суьгьуьрчияр, явабурни ивикъичар, бутпересарни нагьахъ крарал рикӀ алай ва тапархъан тир гьар са кас шегьердилай къеце амукьда.

16 – За, Исади, Зи малаик ракъурнава. Ада иманийрин кӀватӀалар патал и ктабда кхьенвай крарикай шагьидвал ийида. Зун Давудан Хва я. Зун нур гузвай экуьнин гъед я.

17 Руьгьдини суса санал лугьузва:

– Хъша иниз!

И ван хьайи гьар касдини Исадиз «Хъша!» лугьурай.

Къуй къанихди атурай, кӀандайда уьмуьрдин яд гьавая къачурай.

18 И ктабда авай пайгъамбарвилин гафар ван хьайи гьар садаз за тагькимзава: ина кхьенвай гафарал са вуч ятӀани алава хъийидай касдиз Аллагьди гьа и ктабда кхьенвай хьтин завалрални завалар алава хъийида. 19 Сада и ктабда авай пайгъамбарвилин гафарикай са вуч ятӀани гадарайтӀа, Аллагьди а касдин пай атӀуда. А кас и ктабда кхьенвай пак шегьердиз гьахьдач ва ада ана авай уьмуьр гудай тарарин бегьерар недач.

20 И вири крарикай шагьидвал ийизвай Исади квез лугьузва:

– Эхь, зун гьа и мукьвара хкведа.

Амин. Хъша, Ребби Иса!

21 Къуй даим яз Ребби Исадин берекат квехъ виридахъ галаз хьурай. Амин.