‏ Revelation of John 3

Сердерда авай кӀватӀалдиз чар

1Сердер шегьерда авай иманийрин кӀватӀалдин малаикдизни кхьихь: «Аллагьдилай атанвай ирид руьгьни ирид гъед гвайда лугьузва:

– Заз куь крар чизва. Вирида квел чан аламайдай кьазва, амма куьн кьенва. 2Ажалдин ахварай ават! Куь хкатзавай чан уьмуьрдив ахцӀура. Заз куь крарни Зи Аллагьдин вилик тамамбур яз аквазвач. 3Куьне гьихьтин весиятарни несигьатар кьабулнайтӀа, рикӀел хкваш, абур кьилиз акъуд, туба ая. Куьн уях тахьайтӀа, Зун чинебан угъри хьиз куь патав къведа. Гьи чӀавуз Зун куь патав къведатӀа, квез гьич чирни жедач.

4Авайвал лагьайтӀа, вахъ Сердерда чеб чиркинарнавачир са шумуд кас ава. Абур лацу парталар алукӀна Захъ галаз къекъвез жеда. Абур и кардиз лайих я. 5Аллагьдиз акси крарал гъалибвал къачудай гьар сада лацу парталар алукӀда. За гьахьтиндан тӀвар уьмуьрдин ктабдай акъуддач. Зи Бубадин ва Адан малаикрин виликни За ам кьабулда, ам Зи рикӀ алай кас я лугьуда.

6Руьгьди иманийрин кӀватӀалриз вуч лугьузватӀа, япар авайбуруз ван атурай».

Филаделфида авай кӀватӀалдиз чар

7Филаделфи шегьерда авай иманийрин кӀватӀалдин малаикдизни кхьихь:

«Давуд пачагьдин куьлег гвайди атанва, а куьлегдив ахъа авур дапӀарар садавайни агал ийиз хъжедач. Гьа куьлег гвай Халисанда ва Пакда лугьузва квез:

8– Заз куь крар чизва. Ингье, За куьн патал ракӀар ахъайнава. Садавайни ам агализ жезвач. Квехъ чӀехи къуват авач, ятӀани куьне Зи Гаф кьуна, куьне Зи ТӀварцӀикай кьил къакъуднач. 9Ингье, чпи чпикай „Чун чувудар я“лугьуз, амма чеб чувудар тушиз тапарзавайбур, иблисдин межлисдиз кӀватӀ хьанвайбур, атана куь кӀвачерив метӀерал акъвазвайвал ийида За. Абуруз Заз куьн кӀан хьанвайди чир жеда.

10За квез „эха“лагьана эмир гайила, куьне эхна. Гьавиляй чилин вири инсанар синагъ ийидай вахт атайла, За куьн къада-баладикай хуьда. 11Зун гьа и мукьвара къведа. Садани куь таж чуьнуьх тийидайвал, жувахъ авай иман хуьх. 12Аллагьдиз акси крарал гъалибвал къачудай гьар садакай За Зи Бубадин КӀвале даяхдин гул ийида. Ам мад анай маса патахъ ахкъатдач. За адал Зи Аллагьдин ТӀвар, Зи Бубадин патавай цаварилай эвичӀзавай цӀийи Ярусалим шегьердин тӀвар ва зи цӀийи тӀвар кхьида. 13Руьгьди иманийрин кӀватӀалриз вуч лугьузватӀа, япар авайбуруз ван атурай».

Ладикейда авай кӀватӀалдиз чар

14Ладикей шегьерда авай иманийрин кӀватӀалдин малаикдизни кхьихь: «Амин, яни Гьакъикъат тӀвар алайда, вафа гвай ва халисан шагьидди, Аллагьди халкь авунвай кьван затӀарин бине тирда икӀ лугьузва:

15– Заз куь крар чизва. Куьн я къайи туш, я чими. Куьн къайи тиртӀа, ва я куьн чими тиртӀа, вуч хъсан тир! 16Амма куьн къуьруьгъуьм я. Куьн я чимини туш, я къайини. Гьавиляй За куь тӀвар Зи сивяй вегьида. 17Вучиз лагьайтӀа, куьне квекай „чахъ девлет ава, чаз са затӀни кими туш“лугьузва. Амма квез куьн бахт авачирбур ва язухбур тирди, куьн са затӀни авачирбур, буьркьуьбур ва кьецӀилбур тирди чизвач. 18За квез, квехъ девлет хьун патал, Завай михьи къизил маса къачу лугьузва. Куь кьецӀилвили квел гъизвай айиб таквадайвал За квез, Завай маса къачуна, лацу парталар алукӀун меслятзава. Куь вилеризни аквадайвал, абуруз, Завай маса къачуна, дарман квай гъуруш ягъ.

19Заз кӀанибуруз За абурун рехнеяр къалурзава ва абуруз жазани гузва. ГьакӀ хьайила рикӀ хци хьухь ва туба ая.

20Килиг гьа, Зун ракӀарихъ гала, За ракӀар гатазва: Зи ван хьана, ни Заз ракӀар ахъаяйтӀа, Зун гьадан кӀвализ гьахьда, За адахъ галаз санал фу неда, адани Захъ галаз неда.

21Зун гьикӀ гъалиб хьанатӀа, гьикӀ Зи Бубадихъ галаз Адан тахтунал ацукьнатӀа, Аллагьдиз акси крарал гъалибвал къачудай гьар садни За гьакӀ Зи патав ацукьарда.

22Руьгьди иманийрин кӀватӀалриз вуч лугьузватӀа, япар авайбуруз ван атурай».