Rev 4 | LezIBTNT | STEP | Идалай кьулухъ заз цаварин ахъа ракӀар акуна. Виликдай зав рахай, къаргъудай къвезвай хьтин ванци Заз лагьана: – Иниз хкаж хьухь, за ваз идалай кьулухъ вуч хьана кӀандатӀа къалурда.

‏ Revelation of John 4

Цаварал Аллагьдиз къуллугъ авун

1 Идалай кьулухъ заз цаварин ахъа ракӀар акуна. Виликдай зав рахай, къаргъудай къвезвай хьтин ванци Заз лагьана:

– Иниз хкаж хьухь, за ваз идалай кьулухъ вуч хьана кӀандатӀа къалурда.

2 Зак садлагьана Руьгь акатна. Заз цаварал алай чӀехи тахт ва тахтунал Ацукьнавайди акуна. 3 ЧӀехи тахтуна Ацукьнавайда къацу яспис ва яру сардис лугьудай багьа къашари гудай хьтин нурар чукӀурзавай. ЧӀехи тахт къацу зумруд лугьудай багьа къашуни чукӀурдай хьтин нурарин хважамжамди элкъуьрна кьунвай. 4 ЧӀехи тахт къанни кьуд гъвечӀи тахтунин юкьва авай. А тахтарал къанни кьуд агъсакъал ацукьнавай. Абурал лацу парталар, кьилерални къизилдин тажар алай. 5 ЧӀехи тахтунилай цӀайлапанарни къукърумар, гьарай-эвер алахьзавай. Адан вилик ирид чирагъ кузвай. Абур Аллагьдин ирид руьгь тир. 6 ЧӀехи тахтунин вилик буьлуьл ^{▼▼Буьлуьл – вини дережадин ери авай шуьше, хрусталь.} хьтин михьи гьуьлуьз ухшарди квай. ЧӀехи тахтунин кьуд патахъай чан алай кьуд затӀ галай. Абуруз виликайни вилер авай, кьулухъайни. 7 Чан алай сад лагьай затӀ асландиз, кьвед лагьайди данадиз ухшар тир. Чан алай пуд лагьай затӀунихъ инсандин хьтин чин авай, кьуд лагьайди лув гузвай лекь хьиз аквазвай. 8 Чан алай гьар са затӀунихъ ругуд лув квай, луварин кӀаникайни винелай гзаф вилер авай. Чан алай кьуд затӀари юкъуз-йифиз датӀана лугьузва:

– Пак я, Пак я, Агъа вири дуьньядин,
чи Пак Ребби я Ам. Аллагь датӀана
Хьайиди я, авазва Ам, хкведа.

9 Чан алай затӀари тахтунал Ацукьнавайдаз, Мидаим Чан Алайдаз шукурар, гьуьрметар ийидайла, Адаз тарифдин гафар лугьудайла, 10 Тахтунал Ацукьнавайдан вилик къанни кьуд агъсакъал метӀерал акъваззава, эбеди чан алай Адаз икрам ийизва, чпин кьилерал алай тажар чӀехи тахтунин вилик эцигиз, икӀ лугьузва:

11 – Ребби Аллагь, Вун шукурар, гьуьрметар,
гьакӀни гьукум кьабулуниз лайих я,
куьз лагьайтӀа вири Вуна халкьнава,
Ви къастуни гъанва вири арадал,
виридал чан гъанвайдини са Вун я.