Rev 5 | LezIBTNT | STEP | Ахпа заз тахтуна Ацукьнавайдан эрчӀи гъиле кхьинар алай къаргъу аваз акуна. Къаргъудин къенени, винелни кхьинар авунвай. Ам ирид муьгьуьр яна агалнавай.

‏ Revelation of John 5

Кхьинар алай къаргъу ва Аллагьдин КӀел

1 Ахпа заз тахтуна Ацукьнавайдан эрчӀи гъиле кхьинар алай къаргъу аваз акуна. Къаргъудин къенени, винелни кхьинар авунвай. Ам ирид муьгьуьр яна агалнавай. 2 Заз зурба са малаикни акуна.

– И къаргъудал алай муьгьуьрар алудуниз ва ам ахъаюниз вуж лайих я? – лагьана ада кӀеви ванцелди.

3 Я цаварал алай, я чилерал алай, я чилерин кӀаник квай садавайни ахъайна къаргъудиз килигиз жезвачир. 4 Къаргъу ахъайна кӀелиз кьванни жедай лайих авай кас хьанач лугьуз, зун рикӀ хъуткьуниз шехьна. 5 А чӀавуз агъсакъалрикай сада заз лагьана:

– Шехьмир! Ингье, Ягьудан тайифадикай тир Аслан, вични Давудан дувандилай ЭкъечӀнавайди гъалиб хьанва. Адавай и къаргъу алай ирид муьгьуьр алудна ам ахъайиз жеда.

6 Заз къурбанд авунвай хьтин кӀел акуна. Ам тахтунин патав чан алай кьуд затӀунин ва агъсакъалрин юкьва акъвазнавай. Адахъ ирид карч ва ирид вил авай. Ирид вил Аллагьдин ирид руьгь тир. Абур Аллагьди чилел ракъурнавайбур тир. 7 КӀеле атана тахтуна Ацукьнавайдан эрчӀи гъиляй къаргъу къачуна. 8 Ада къаргъу къачурла, чан алай кьуд затӀни къанни кьуд агъсакъал КӀелен вилик метӀерал акъвазна. Абурув гьар садав са арфани атиррив ацӀанвай къизилдин сукӀра гвай. Атирар – Аллагьдиз талукьбурун дуьаяр тир. 9 Чан алай кьуд затӀунин агъсакъалри цӀийи мани лагьана:

Къаргъу къачуз, адал алай муьгьуьрар
алуд ийиз лайихди са Вун я,
куьз лагьайтӀа Вун къурбанддиз акъудна.
Гьар са чӀал гвай халкьарикай, тухумдай,
тайифадай Вуна Жуван Ивидихъ
Аллагь патал инсанарни къачуна,
10 абурукай къуллугъдай чи Аллагьдиз
пачагьарни хахамарни авуна,
Ва пачагьвал абуру чилел ийида.

11 Заз тахт, чан алай кьуд затӀ ва агъсакъалар юкьва туна акъвазнавай гзаф малаикар акуна, абурун ванер атана. Абурун кьадарни лап тежер кьван гзаф хьанвай, агъзур агъзурдав кьван агакьнавай. 12 Абуру кӀеви ванцелди лугьузвай:

– Къурбанднавай и КӀел гзаф зурба я,
ава Адахъ девлет, камал, къуватни,
чна Адаз гьуьрметзава рикӀивай,
шукурзава, Адан тариф ийизва.

13 Заз цаварал алай, чилерал алай, чилерин кӀаник квай, гьуьлерал алай вирида икӀ лугьудай ван атана:

– Ацукьнавайдаз тахтунал ва КӀелез
Шукур хьурай, абуруз гьуьрмет авурай,
Абурун тариф авурай ва алаз хьуй
Чилин-цавун кьилел абур датӀана!

14 Чан алай кьуд затӀуни «амин» лагьана. Къанни кьуд агъсакъал метӀерал акъвазна ва абуру тахтуна Ацукьнавайдаз икрам авуна.