Rev 6 | LezIBTNT | STEP | Заз КӀеле къаргъудал алай ирид муьгьуьрдикай сад лагьайди алудайди акуна. Заз чан алай кьуд затӀуникай сада цавун къукърумрин ванцелди икӀ лугьузвай ван атана:

‏ Revelation of John 6

Сифтегьан ругуд муьгьуьр алудун

1 Заз КӀеле къаргъудал алай ирид муьгьуьрдикай сад лагьайди алудайди акуна. Заз чан алай кьуд затӀуникай сада цавун къукърумрин ванцелди икӀ лугьузвай ван атана:

– Инал ша!

2 Ингье, заз лацу шив акуна, адал гъиле чемерукӀ авай сад ацукьнавай. Мияхдиз ^{▼▼Миях – шивцел алай инсан.} пачагьдин тажни гана. Ам гъалиб хьанвайди хьиз атанай. Ам гъалибвал къачуз атанвай.

3 КӀеле кьвед лагьай муьгьуьр алудайла, заз чан алай кьвед лагьай затӀунин ван атана.

– Инал ша!

4 Гила цӀай хьтин куьрен шив атана. Адал ацукьнавайдаз чилел инсанри сада сад рекьиз дявеяр ийидай ихтияр гана. Адан гъиле чӀехи турни туна.

5 КӀеле пуд лагьай муьгьуьр алудайла, заз чан алай пуд лагьай затӀунин ван атана:

– Инал ша!

Ингье, заз чӀулав шив акуна. Адал миях алай. Адан гъиле терезар авай. 6 Заз чан алай кьуд затӀунин арадай ихьтин ван атана:

– Са йикъан гьакъидин къимет – са киле къуьл хьурай; са йикъан гьакъидин къимет – тек пуд киле мух хьурай! Зейтун тарар ^{▼▼Зейтун тарцин бегьеррикай чӀем хкуддай.} авай чкаярни ципицӀбагълар барбатӀ мийир!

7 КӀеле кьуд лагьай муьгьуьр алудайла, заз чан алай кьуд лагьай затӀунин ван атана:

– Инал ша!

8 Ингье, заз мейитдин ранг алай шив акуна, адал Ажал тӀвар алай сад ацукьнавай. Адан гуьгъуьналлаз агъа дуьнья къвезвай. Абуруз кьведаз чилин инсанрин кьудай са пай туруналди ва кашалди, азарралди ва ничхиррин къармахралди тергдай ихтиярар гана.

9 КӀеле вад лагьай муьгьуьр алудайла, заз къурбангандин ^{▼▼Къурбанган – Ам кьуд пипӀенди тир. Адан кьуд пипӀел кьуд карч алай. ТукӀунвай гьайванар гъиз адан винел кудай.} кӀаник квай руьгьер акуна. Абур Аллагьдин Гафуникай шагьидвал авурвиляй яна кьейибурун руьгьер тир. 10 Руьгьери кӀеви ванцелди цӀугъ авуна:

– Я Вири Ихтияррин Иеси! Я Пакди ва Халисанди. Чилел чи иви авадарай инсанрин дуван тавуна ва абурулай кьисас къахчун тавуна Вун гьикьван чӀавалди акъвазда?

11 Ягъна кьейибурув гьар садав лацу парталар вугана. Абуруз чилел аламай чпин юлдашрикай, стхайрикай ва вахарикай, са кьадарбур яна рекьидалди са тӀимил вахтунда секин хьана акъваз лагьана.

12 Заз КӀеле ругуд лагьай муьгьуьр алудайди акуна. ЧӀехи залзала хьана, рагъ, ших хьиз, чӀулав хьана, ацӀай варзни, иви хьиз, – яру. 13 Гъетер цавай чилел аватна, налугьуди гару юзурзавай инжилдин тарци вичин чранвачир инжилар гадарзава. 14 Цав къаргъу хьтиндаз элкъвена. Дагъларни гьуьлерал алай къураматар алай чкадилай юзана. 15 Чилин пачагьар, везир-векилар, девлет авайбур, кьушунрин кьилевайбур, къуват авайбур, гьар са лукӀ ва азад инсан магъарайрани дагъларин хъиткьерра чуьнуьх хьана. 16 Абуру дагъларизни къванериз лугьузвай:

– Чи винел ават. Чун тахтуна Ацукьнавайдан вилерикай ва КӀелез атанвай хъилекай кӀев ая. 17 Тахтунал Ацукьнавайдаз ва КӀелез хъел къведай чӀехи югъ алукьнава. Нивай а хъилен вилик акъвазиз жеда кьван?