Rev 7 | LezIBTNT | STEP | Ахпа заз чилин кьуд пипӀел акъвазнавай кьуд малаик акуна. Я чилел, я гьуьлел, я са тарцел гзаф гар тахьун патал абуру чилин кьуд патай къвезвай кьуд гар кьуна акъвазарнавай.

‏ Revelation of John 7

Тахтунин ва КӀелен вилик гзаф халкь кӀватӀ хьун

1 Ахпа заз чилин кьуд пипӀел акъвазнавай кьуд малаик акуна. Я чилел, я гьуьлел, я са тарцел гзаф гар тахьун патал абуру чилин кьуд патай къвезвай кьуд гар кьуна акъвазарнавай. 2 Заз рагъэкъечӀдай патай хкаж жезвай маса малаик акуна. Адав чан алай Аллагьдин тагъма гвай. Чилизни гьуьлуьз зиянар гунин ихтияр гвай и кьуд малаикдиз ада кӀевиз гьарайна:

3 – Чи Аллагьдин лукӀарин пелерал тагъма гьалч тавунмаз я чилиз, я гьуьлуьз, я тарариз зиянар гумир.

4 Заз пелел тагъма гьалчайбурун кьадар гьикьван ятӀа ван хьана: Исраилдин вири тайифайрин веледрикай тир абурун кьадар вишни яхцӀурни кьуд агъзур хьанвай.

5 Ягьудан тайифадикай цӀикьвед агъзур касдал,
Рувенан тайифадикай цӀикьвед агъзур касдал,
Гадан тайифадикай цӀикьвед агъзур касдал,
6 Ашеран тайифадикай цӀикьвед агъзур касдал,
Нифталидин тайифадикай цӀикьвед агъзур касдал,
Манашедин тайифадикай цӀикьвед агъзур касдал,
7 Шимунан тайифадикай цӀикьвед агъзур касдал,
Левидин тайифадикай цӀикьвед агъзур касдал,
Исахаран тайифадикай цӀикьвед агъзур касдал,
8 Забулунан тайифадикай цӀикьвед агъзур касдал,
Юсуфан тайифадикай цӀикьвед агъзур касдал,
Бунъяминан тайифадикай цӀикьвед агъзур касдал тагъма гьалчнавай.

9 Ахпа ингье заз лап гзаф инсанар акуна. Абурун кьадар садавайни гьисабиз жедачир. Абур чилин вири тайифайрикайни тухумрикай, гьар жуьредин чӀаларал рахазвай халкьарикай тир. Абур лацу парталар алаз, гъилера хурмадин тарцин хилер аваз ЧӀехи тахтунин ва КӀелен вилик акъвазнавай. 10 КӀеви ванцелди абуру лугьузвай:

– Тахтуна ацукьнавай чи Аллагьди ва КӀеле вири хиласда.

11 Вири малаикри тахтни агъсакъаларни чан алай кьуд затӀ элкъуьрна юкьва тунвай. Абуру тахтунин вилик метӀерал акъвазна, чинар агъуз ийиз Аллагьдиз икрамна.

12 – Амин! – лагьана абуру. – Камал, къуват Авайди я, баркаллани Алайди я,
зурбани я Аллагь чи.
Чна Адан тарифзава, Адаз шукур ийизва,
чна Адаз гьуьрметар ийизва даим. Амин.

13 Агъсакъалрикай сада завай хабар кьуна:

– И лацу парталар алайбур вужар я? Абур гьинай атанвайбур я?

14 – Заз чидач, ваз чизва, зи агъа, – лагьана за.

– Абур чӀехи азиятрай акъатнавайбур я, – лагьана ада. – Абуру чпин парталар КӀелен Ивидай чуьхвена ва пекер михьи-лацу хьана.

15 ГьакӀ тирвиляй къе Аллагьдин тахтунин
вилик абур акъвазнава. Абуру
гьам юкъузни, гьам йифизни Аллагьдиз
къуллугъзава Ибадатханада.
Тахтунавай Падишагьди абурун
кьилел Вичин экуь чардах ахъайда.
16 Абуруз чир хъжедач каш вуч ятӀа,
я абур мад хъжедач цихъ гьарарат,
я ракъини, я зегьемди хкудач,
17 куьз лагьайтӀа пак тахтунин юкьваллай
абур хуьда, абур тухуда
уьмуьр гудай ятар авай булахрал.
Абурун гьар са стӀални накъвадин
вилерилай михь ийида Аллагьди.