Rev 8 | LezIBTNT | STEP | КӀеле ирид лагьай муьгьуьр алудайла, цаварал са зур сятда кьван секинвал акьалтна.

‏ Revelation of John 8

Ирид лагьай муьгьуьр ва ирид малаик

1 КӀеле ирид лагьай муьгьуьр алудайла, цаварал са зур сятда кьван секинвал акьалтна. 2 Заз Аллагьдин вилик акъвазнавай ирид малаик акуна. Абурув гьар садав са къаргъу вугана. 3 Ахпа са маса малаик атана, къурбангандин вилик акъвазна. Адан гъиле атирар кудай сукӀра авай. Адав са гзаф атирарни вугана. Ада атирар Аллагьдиз талукьбурун дуьаярни галаз тахтунин вилик квай къизилдин къурбангандал эцигна. 4 Атирар кана акъатзавай гум Аллагьдиз талукь ксарин дуьайрихъ галаз малаикдин гъиле авай сукӀрадай Аллагьдин вилик хкаж хьана. 5 Малаикди атирар кузвай сукӀра хкажна, ам къурбангандилай къачунвай кузвай цукӀварив ацӀурна, ахпа абур чилел ичӀирна. Гьа чӀавуз гьарай-эвер акъатна, къукърумарни цӀайлапанар яна. Чилел залзала хьана.

Сифтегьан ругуд къаргъу

6 Гьар садав са къаргъу гвай ирид малаик къаргъуяр ягъиз гьазур хьана.

7 Сад лагьай малаикди къаргъу яна. Иви какахьнавай харни цӀай акъатна чилел авахьна. Чилин пудай са паюнал алай тарарни къацу векь кана.

8 Кьвед лагьай малаикди къаргъу яна. ЦӀай кьуна кузвай чӀехи дагъ гьуьлуьз аватна. Гьуьлуьн пудай са паюникай иви хьана. 9 Гьуьле уьмуьр тухузвай чан алай кьван гьайванрин пудай са пай кьена, гимийрин пудай са пайни терг хьана.

10 Пуд лагьай малаикди къаргъу яна. Кузвай чирагъдиз ухшар чӀехи гъед цавай аватна. Ам вацӀарин ва булахрин пудай са паюнал алукьна. 11 И гъетрен тӀварни Явшан тир. Пудай са пай вацӀарани булахра авай яд явшан хьиз туькьуьл хьана. Туькьуьл хьайи яд хъвайивиляй гзаф инсанар кьена.

12 Кьуд лагьай малаикди къаргъу яна. Ракъининни, вацранни, гъетеринни пудай са пай кьуна. Абур мичӀи хьана. Йикъан пудай са пай экуьникай магьрум хьана, йифен пудай са паюна вацрани гъетери экв ганач.

13 Заз цавун юкьвай тӀуз лув гузвай лекь акуна ва адан ван хьана.

– Гуж я, гуж я, гуж я чилел уьмуьр тухузвай квез муькуь пуд малаикдин къаргъуйрин ванери ийидайди! – лагьана ада кӀеви ванцелди.