Rev 9 | LezIBTNT | STEP | Вад лагьай малаикди къаргъу яна. Заз цавай чилел аватай гъед акуна. Малаикдив гургусдин куьлег вуганвай.

‏ Revelation of John 9

1 Вад лагьай малаикди къаргъу яна. Заз цавай чилел аватай гъед акуна. Малаикдив гургусдин ^{▼▼Гургус – кӀан квачир зурба дагьар хьтинди.} куьлег вуганвай. 2 Ада гургусдин къуй ахъайна. Анай чӀехи пичинай хьиз гум акъатна. Гургусдай акъатай гумадик рагъ ва гьава чӀулав хьана. 3 Гумадай гзаф цицӀерин лужар акъатна чилел фена. Абуруз акьрабриз авай хьтин къуват гана. 4 ЦицӀериз я чилин векьериз, я маса къацу векьиз-кьалаз, я са тарциз зиян гумир лагьана, зиянар гуз хьайитӀа, анжах пелерал Аллагьдин тагъма алачир инсанриз це лагьана. 5 ЦицӀериз ахьтин инсанар рекьидай ваъ, анжах вад вацран къене абуруз азаб-азият ийидай ихтияр гана. ЦицӀери гудай азабар акьрабди хуз гайидай я. 6 А йикъара инсанар чпин ажалдихъ къекъвез жеда, амма абуруз жагъидач. Абуруз чеб кьена кӀан жеда, амма ажал абурукай катда. 7 Чпин акунралди цицӀерин луж дяведиз гьазурнавай шиверин рамагдиз ухшар тир; цицӀерин кьилерал къизилдин тажар хьтинбур алай, абурун чинар, лагьайтӀа, инсанрин чинриз ухшар тир. 8 Абурун чӀарар папан чӀарар хьиз тир, сарар асландин кӀирериз ухшар тир. 9 Абурал ракьукай авунвай хьтин кьеркьер алай. Абурун луварин ван дяведиз физвай шиверихъ галай дапурагрин чархарин ван хьиз тир.

10 ЦицӀерин тумарихъ, акьрабрин тумарихъ хьиз, хузар авай. ЦицӀериз вад вацран къене инсанриз зиянар гунин ихтияр ганвай.

11 ЦицӀерин кьиле гургусдин пачагьвалзавай малаик авай. Адан тӀвар чувуд чӀалалди Абадан, юнан чӀалалдини Апалуьн тир. Яни Тергдайди.

12 Сад лагьай гуж алатна. Ингье гила адан гуьгъуьналлаз мад кьве гуж къведа.

13 Ругуд лагьай малаикди къаргъу яна. Заз Аллагьдин вилик квай къурбангандин кьуд крчунилай къвезвай са ван атана. 14 А ванци къаргъу гвай ругуд лагьай малаикдиз лагьана:

– ЧӀехи Эфрат вацӀун патав кутӀуннавай кьуд малаик ахъая. 15 Инсанрин пудай са пай терг ийиз эгечӀдай сят ва югъ, варз ва йис патал гьазурнавай кьуд малаикни ахъайна. 16 Эфратдин патавай шиверал алайбурун кьушун экъечӀна. Заз аскеррин кьадар гьикьван ятӀа ван хьана. Абуруз кьадар авачир. 17 Заз шиверни мияхар ихьтинбур яз акуна: мияхрал цӀай хьтин яру, мичӀи-вили ва гугурт хьиз хъипи кьеркьер алай. Шиверин кьилер асланрин кьилер хьиз тир. Абурун сиверай цӀайни, гугуртни гум акъатзавай. 18 И пуд завалдик, шиверин сиверай акъатзавай цӀукни, гумадикни гугуртдик инсанрин пудай са пай телеф хьана. 19 Шиверин къуват, лагьайтӀа, абурун сиверани тумара авай. Абурун тумарин чкадал гъуьлягъар алай. Шивери гъуьлягърин кьилералди зиянар гузвай. 20 И завалрик кьин тавур инсанри чпи туькӀуьрай бутриз икрам ийизмай. Абуру са затӀни таквадай, са куьнинни ван текъведай, я къекъвезни тежедай бутриз, къизилдикай, гимишдикай, буьруьнждикай, къванцикай ва кӀарасдикай авунвай бутриз ва чӀуру жинерриз къуллугъзамай. 21 А инсанри маса ксар ягъиз рекьин, суьгьуьрчивилер, явавилер, угъривилер авун акъвазарнавачир.