Tit 1 | LezIBTNT | STEP | Аллагьдин лукӀ, гьакӀни Иса Месигьдин илчи тир, хкягъайбур имандихъ, муъминвилихъ тухузвай ва эбеди уьмуьр хьунин умуд гузвай гьакъикъат кьатӀунал гъун патал ракъурнавай Павелан патай.

‏ Titus 1

Саламар

1 Аллагьдин лукӀ, гьакӀни Иса Месигьдин илчи тир, хкягъайбур имандихъ, муъминвилихъ тухузвай ва эбеди уьмуьр хьунин умуд гузвай гьакъикъат кьатӀунал гъун патал ракъурнавай Павелан патай. 2 И эбеди уьмуьр садрани таб тийидай Аллагьди гьеле дуьнья халкь ийидалди гуда лагьана хиве кьунай. 3 Тайинарнавай вахт алукьайла, Ада Аллагьдин – чи Хиласкардин, – эмирдалди зал ихтибарнавай вязинин куьмекдалди Вичин къастарикай лагьана.

4 Уртах имандин рекьяй зи халисан хва ТӀитӀаз:

Аллагь Бубадин ва чи Хиласкар тир Иса Месигьдин патай берекат ва саламатвал хьурай ваз.

Кьиле акъвазнавайбурун ери

5 За вун КиритӀдал авиляй тунай хьи, кьил кутунвай кар вуна эхирдал кьван тухун патал ва, за ваз эмир авурвал, гьар шегьерда иманийрин кӀватӀалдин кьиле акъваздайбур тайинарун патал. 6 Кьиле акъваздай кас айиб квачирди, са папан гъуьл хьунухь лазим я; адан аяларни иманияр хьун, явабур ва яб тагудайбур я лагьай чӀуру тӀвар алачирбур хьун лазим я. 7 Ам айиб квачирди хьун лазим я, гьикӀ лагьайтӀа ада Аллагьдиз талукь кӀватӀал идара ийизва. Ам кьама ял авайди, хъел акатдайди, хъивегьунихъ ялдайди, кикӀидайди, вил ичӀиди тахьун герек я. 8 Аксина, ам мугьманрал рикӀ алай, дугъривал кӀандай, акьул авай, гьахъ-михьи, муъмин, вич вичел алай кас хьана кӀанда. 9 Адавай масадбурузни дуьз тербет тирвал несигьат гуз хьун патал ва адаз аксивалзавайбур инкариз хьун патал вичиз чирнавай гьакъикъи гафуниз ам вафа хьана кӀанда.

Тапан муаллимриз вуч авуна кӀанда

10 Иллаки Месигьдин имандал атай чувудрин арада чпел са гьукумни кваз такьадай, кьуру рахунрал алахъдай ва масадбур алцурардай ксар гзаф ава. 11 Абур кис хьуниз мажбурна кӀанда, вучиз лагьайтӀа абуру чпин нефсинин темягьриз килигна сагъ хизанар рекьяй акъудзава, абуруз чирна виже текъведай крар чирзава. 12 Гьатта абурукай сада, абурун хсуси пайгъамбарди лагьанай: «КиритӀвияр датӀана тапархъанар, вагьши гьайванар, темпел руфунбазар я». 13 – 14 Им дуьз шагьидвал я. Гьавиляй абурун иман дуьзди хьун патал абуруз кӀевелай лагь. Къуй абуру чувудри туькӀуьрнавай тапарриз ва гьакъикъатдихъ далу элкъуьрнавай ксарин тагькимриз яб тагурай. 15 Михьибур патал вири михьи жеда, амма чиркин ва иман гвачир инсанар патал михьи са затӀни авач, вучиз лагьайтӀа абурун акьул ва виждан чиркин я. 16 Абуру чпиз Аллагь чида лугьуз малумарзава, амма абуру чпин краралди Адакай кьил къакъудзава. Абур рикӀиз такӀан, чӀалаз килиг тийидайбур ва чпикай хъсан са кар патални хийир авачирбур я.