Tit 2 | LezIBTNT | STEP | Вуна, лагьайтӀа, дуьз тербетдив кьурвал чирвилер гун лазим я.

‏ Titus 2

КӀватӀал патал къайдаяр

1 Вуна, лагьайтӀа, дуьз тербетдив кьурвал чирвилер гун лазим я. 2 Яш хьанвай итимриз чпи чеб дуьз тухуз, гьуьрмет хуьз, акьул артухариз, дуьз иманияр, муьгьуьббат гвайбур ва сабур авайбур жез чир ая.

3 Яш хьанвай папаризни чеб имандиз кутугайвал тухун, фитнеяр тавун ва са акьван артух чехир хъун тавун паталай тагьким ая. Абуру жегьил папариз хъсан крар ийиз чирна кӀанда, 4 – 5 Аллагьдин Гафунал леке татун патал, жегьил папариз чпин гъуьлер кӀан хьухь, аялар кӀан хьухь лугьуз, акьул авайбур, ахлакь авайбур, хъсан кайванияр, къени ва чпин гъуьлериз яб гудайбур хьухь лугьуз несигьатар гана кӀанда.

6 Жегьил итимривай чпивай чеб гъиле кьаз хьун тӀалаба. 7 – 8 Хъсан краралди жува абуруз гьар патахъай чешне къалура. Чакай писдаказ рахадай са багьнани жагъун тавуна, гьар аксина экъечӀдайдаз регъуь жедайвал, ачухдаказ ва дуьздаказ, кутугай ва айиб квачир келимайралди чирвал це.

9 – 10 ЛукӀариз вири крара чпин иесийрин чӀалаз килигиз ва абурун гафунал гаф эциг тийиз чира. Къуй абуру чуьнуьхунар тавурай, чеб далу агалдиз жедай инсанар хьиз тухурай, хийир квайбур хьурай. Идалди виридаз чи Хиласкар тир Аллагьдин тербет иерди тирди аквада.

11 ГьикӀ лагьайтӀа вири инсанриз хиласвал гудай Аллагьдин берекат пайда хьанва. 12 – 13 Ада чаз чалкечирвал ва чилин уьмуьрдиз хас гьевесар жував агуд тийиз, и дуьньяда гьахъдаказ ва муъминдаказ, жува жув гъиле кьуналди, бахтавар умуд кьилиз акъатунал – чӀехи Аллагь ва чи Хиласкар Иса Месигь баркалла аваз хтунал вил алаз уьмуьр тухуз чирзава. 14 Чун вири къанунсузвилерикай хиласун патал ва чун михьи авун патал, чун Вичин кьилдинди тир, хъсанвал авунихъ къаних халкь авун патал, Месигьди Вичин чан чун паталди гана.

15 Вуна гьа икӀ масадбуруз чира. Гьукум гъилевай касди хьиз, кӀубанар ая ва чӀурувилер винел акъуд, жуваз садавни гьисаба авачир жуьреда килигиз тамир.