‏ John 18:28-40

Иса ПилатӀан вилик

(МатӀ. 27:1-2, 11-14; Мрк. 15:1-5; ЛкӀ. 23:1-5)

28Экуьн яралай Иса Каяфан патавай Римдин сердердин дараматдиз тухвана. Чувудар Песагь суварин суфрадихъ ацукьиз гьазур хьанвай, гьавиляй абуруз, чеб чиркин тахьурай лугьуз, утагъдиз гьахьиз кӀанзавачир.

29ГьакӀ хьайила ПилатӀ вич абурун вилик экъечӀна лагьана:

– И Касдик куьне вуч тахсир кутазва?

30– И Касди са чӀуру кар авунвачиртӀа, чна Ам ви патав гъидачир, – жаваб гана абуру.

31– Ам хутахна Адан дуван куьне куь Къанундалди ая, – лагьана ПилатӀа.

– Чаз са касни кьиникьиз акъуддай ихтияр авач, – лагьана чувудрин кьиле авайбуру.

32Исади Вич гьихьтин ажалдик рекьидатӀа виликамаз лагьайвал, гьам кьилиз акъатдайвал хьана. 33Гьа чӀавуз ПилатӀа мад дараматдиз гьахьна, эверна Исадивай хабар кьуна:

– Вун Чувудрин Пачагь яни?

34– Им жува кьатӀанани, я тахьайтӀа ваз масадбуру лагьанани? – жаваб гана Исади.

35– Зун чувуд яни кьван? – жаваб гана ПилатӀа. – Ви халкьди ва чӀехи хахамри Вун гъана зи гъиле тунва. Вуна вуч авунва?

36– Зи Пачагьлугъ и дуьньяда авач, – жаваб гана Исади. – Зи Пачагьлугъ и дуьньяда авайтӀа, Зи къуллугъдал алайбуру, Зун чувудрин гъиле тун тавун патал, женг чӀугвадай. Амма гила Зи Пачагьлугъ и дуьньядикай туш.

37– АкӀ хьайила Вун Пачагь я ман? – лагьана ПилатӀа.

– Вуна жува Зун Пачагь я лугьузва, – жаваб гана Исади. – Зун дидедиз хьунни, и дуьньядиз ракъурунни гьакъикъатдикай хабар гун патал я. Гьар вуж гьакъикъатдин пата аватӀа, гьада Зи гафуниз яб гузва.

38– Гьакъикъат вуч затӀ я? – хабар кьуна ПилатӀа.

ИкӀ суал гана, ам чувудрин патав хъфена, лагьана:

– Заз адак са тахсирни кваз аквазвач.

Иса кьиникьин къарар

(МатӀ. 27:15-30; Мрк. 15:6-19; ЛкӀ. 23:13-25)

39Амма квехъ Песагь суварин юкъуз къазаматдай са кас ахъаюн тӀалабдай адет ава. Квез кӀандатӀа, Чувудрин Пачагь ахъайдани?

40Адаз жаваб яз вирида гьарайна:

– Ам ваъ, Бараб ахъая.

Бараб, лагьайтӀа, къачагъ тир.

‏ John 19:1-16

1И чӀавуз ПилатӀа Иса къамчидив гатут лагьана эмир гана. 2Аскерри къакъвадин таж храна, ам Исадин кьилел эцигна, Адал икьи-яру аба алукӀна. 3Абуру лугьуз хьана:

– Сагъ хьурай Чувудрин Пачагь!

ГьакӀ лугьуз Ам гатаз хьана.

4ПилатӀа, мад экъечӀна, чувудриз лагьана:

– Килиг. Адак са тахсирни кваз таквазвайвиляй ингье за Ам мад куь вилик гъизва.

5И чӀавуз къакъвадин тажни икьи яру аба алаз Иса атана. ПилатӀани абуруз лагьана:

– Ингье, Им гьа Инсан я!

6Ам акурвалди чӀехи хахамрини Аллагьдин КӀвалин къаравулри «Ам хашуниз ягъ, хашуниз ягъ!» лугьуз гьарайна.

– Ам кьуна куьне хашуниз ягъ, заз Адак са тахсирни кваз аквазвач, – лагьана ПилатӀа.

7– Ада Вичиз Аллагьдин Хва лугьузва, – жаваб гана чувудри. – Чахъ къанун ава, чи Къанундалди Ам кьин лазим я.

8И гафар ван хьайи ПилатӀаз амайдалайни кичӀе хьана, 9Ада, дараматдиз хтана, Исадивай хабар кьуна:

– Вун гьинай я?

Исади жаваб ганач.

10– Вуна заз жаваб гузвачни? – лагьана ПилатӀа. – Вун ахъа хъувунни, хашуниз ягъунни зи гъиле авайди ваз чизвачни?

11– Ваз Цавари ихтияр ганачиртӀа, вахъ а ихтияр жедачир, – жаваб гана Исади. – ГьакӀ хьайила Зун ви гъиле тур касдин гунагь мадни чӀехи я.

12Инлай ПилатӀ Иса ахъайдай багьнадихъ къекъвез хьана. Амма чувудри гьараярзавай:

– Вуна Ам ахъаяйтӀа, вун Римдин пачагьдин дуст туш. Ни вич пачагьдай кьадай кьасар ийизватӀа, ам Римдин пачагьдин душман я.

13И гафар ван хьайи ПилатӀа Иса Къванцин Шегьре лугьудай майдандал акъудна. А чкадиз чувуд чӀалал Габат лугьуда. Анал ПилатӀ дуванбегдин чкадал ацукьна. 14Гьа вахт Песагь суварин вилик квай жуьмя югъ тир. Югъни атана частуниз мукьва жезвай. ПилатӀа чувудриз лагьана:

– Им куь Пачагь я!

15– Йикь, Ам йикь, хашуниз ягъ! – гьарайна абуру.

– Куь Пачагь За хашуниз яна кӀанзавани квез? – лагьана ПилатӀа.

– Чахъ Римдин пачагьдилай гъейри маса пачагь авач, – жаваб гана чӀехи хахамри.

16Эхирни ПилатӀа, Иса хашуниз ягъун патал, абурун гъиле туна. Аскерри Иса кьуна тухвана.