Luk 9:28-36 | LezIBTNT | STEP | И гафар лагьана са гьафте кьван алатайла, Петру, Ягья ва Якьуб галаз Иса дуьаяр ийиз дагъдиз хкаж хьана.

‏ Luke 9:28-36

Исадин къамат дегиш хьун

(МатӀ. 17:1-13; Мрк. 9:2-13)

28 И гафар лагьана са гьафте кьван алатайла, Петру, Ягья ва Якьуб галаз Иса дуьаяр ийиз дагъдиз хкаж хьана. 29 Ада дуьа ийидайла, Адан къамат дегиш хьана, Адан пекерни лацу хьана цӀарцӀар гуз акъвазна. 30 Гьа вахтунда Адахъ галаз кьве касди суьгьбет ийизвай: сад Муса тир, муькуьдини – Ильяс. 31 Баркалла алаз атанвай абур Иса Ярусалимда рекьидайдакай рахазвай.

32 Абуру ихтилатар ийизвай чӀавуз Петру ва адахъ галайбур ахвариз фенвай. Ахварай аватайла, абуруз Исадин баркаллади гузвай рапрап ва Исадихъ галаз акъвазнавай кьве итим акуна. 33 А итимар Исадин патавай хъфидайла, Петруди, вичи вуч лугьузватӀа течиз, Исадиз лагьана:

– Устаз! Чун ина аваз хъсан хьана. Ша чна ина пуд кума эцигин: сад Ваз, сад Мусадиз, садни Ильясаз.

34 Ада и гафар лугьудайла, тилмизар цифедин хъендик акатна. Чеб цифедик акатайла, тилмизриз кичӀе хьана. 35 Цифедай рахадай ван акъатна:

– Ам Зи хкянавай Хва я, Адан чӀалаз килиг.

36 А ван атӀайла, Иса анал мад текдиз аламай. Чпиз акурдакай Петруди ва адахъ галай тилмизри а вахтунда садазни лагьанач.