Mar 14:43-50 | LezIBTNT | STEP | Гаф мецел аламаз, Адан цӀикьвед илчидикай сад тир Ягьуд атана акъатна. Адахъ чӀехи хахамри, тавратдарри ва агъсакъалри ракъурнавай гзаф инсанар галай. Абурув турарни вагьрамар гвай.

‏ Mark 14:43-50

Иса маса гун ва кьун

(МатӀ. 26:47-56; ЛкӀ. 22:47-53; Ягь. 18:3-11)

43 Гаф мецел аламаз, Адан цӀикьвед илчидикай сад тир Ягьуд атана акъатна. Адахъ чӀехи хахамри, тавратдарри ва агъсакъалри ракъурнавай гзаф инсанар галай. Абурув турарни вагьрамар гвай. 44 Хаинди вичихъ галайбур Иса маса гунин ишарадин гъавурда туна:

– Низ за салам гана темен гайитӀа, Ам Гьам жеда. Вегьена, Ам яхъ. Килиг, Ам тухудайла, Адалай вил алудиз тахьуй, мукъаят хьухь.

45 Атанмазни Ягьуда, Исадиз мукьва хьана, «Муаллим!» лагьана, Адаз темен гана. 46 Гьа инал Ягьудахъ галайбуру вегьена Иса кьуна. 47 Амма Исадихъ галайбурукай сада вичин тур акъудна, кьилин хахамдин са лукӀ яна, адан яб галудна.

48 И чӀавуз Исади атанвайбуруз лагьана:

– Зун кьун патал, куьн, къачагъ кьаз фидайвал, турарни вагьрамар гваз атанва хьи? 49 Зун гьар юкъуз чирвилер гуз квехъ галаз санал Аллагьдин КӀвале жедай, амма ана куьне Зак кязавачир. Гила къуй Каламда кхьенвайди Зи кьилел атурай!

50 Гьа вахтунда вири тилмизар, Ам гьанал туна, катна.