Mar 8:31-9:1 | LezIBTNT | STEP | Исади Вичин тилмизар «Инсандин Хци гзаф азаб-азиятар чӀугун лазим я», – лугьуз гъавурда тваз хьана. – Агъсакъалри, чӀехи хахамри, тавратдарри Инсандин Хва кваз кьадач, абуру Адаз кьиникьин жаза гуда, пуд йикъалай Адал чан хкведа,

‏ Mark 8:31-38

Исади Вичин кьиникьикай сад лагьай гъилера лугьун

(МатӀ. 16:21-28; ЛкӀ. 9:22-27)

31 Исади Вичин тилмизар «Инсандин Хци гзаф азаб-азиятар чӀугун лазим я», – лугьуз гъавурда тваз хьана.

– Агъсакъалри, чӀехи хахамри, тавратдарри Инсандин Хва кваз кьадач, абуру Адаз кьиникьин жаза гуда, пуд йикъалай Адал чан хкведа, – лагьана Ада.

32 И гафар Ада ачухдиз лугьузвай. Амма Петруди, Адаз са къерехдиз эверна, ахьтин чӀуру гафар сивяй акъудмир лагьана. 33 Элкъвена Вичин тилмизриз килигиз-килигиз, Исади Петрудин гаф атӀана:

– Алат Залай, иблис! Ви рикӀе авайди Аллагь туш, вибур инсанри ийидай хьтин фикирар я.

34 Ахпа Исади халкьдизни Вичин тилмизриз санал эверна.

– Низ Захъ галаз къвез кӀанзаватӀа, къуй ам, чандилайни гъил къачуна, вичин азабрин хашни кӀулаз яна Захъ галаз атурай, – лагьана Ада. – 35 Низ вичин чан хуьз кӀанзаватӀа, адавай ам къакъатда, Зун ва Шад Хабар патал ни вичин чан эцигайтӀа, адан чан сагъ жеда. 36 Вичин чан пучна вири дуьнья къачуникай инсандиз вуч хийир ава? 37 Вичин къакъатай чан элкъвена къахчун патал гудай затӀ инсандиз жагъидани?

38 Къенин несил гьикьван чӀур ва чалкечир хьанва! Адакай низ Зунни Зи Гафар кьабулиз регъуь хьайитӀа, Инсандин Хцизни, Вичин Бубадин баркалла алаз, пак малаикрихъ галаз къведайла, гьахьтин касни кьабулиз регъуь жеда.

‏ Mark 9:1

1 Исади абуруз мад лагьана:

– За квез рикӀивай лугьузва: инал акъвазнавайбурук ахьтинбур ква хьи, абуруз Аллагьди къудрат гваз ийидай Пачагьвал акун тавунмаз, гьич ажални аквадач.