Mat 13:10-23 | LezIBTNT | STEP | Исадин тилмизри Адан патав атана хабар кьуна: – Вун инсанрихъ галаз кьисайралди вучиз рахазва?

‏ Matthew 13:10-23

Кьисадин мана ачухарун

(Мрк. 4:10-20; ЛкӀ. 8:9-15; 10:23-24)

10 Исадин тилмизри Адан патав атана хабар кьуна:

– Вун инсанрихъ галаз кьисайралди вучиз рахазва?

11 Абуруз жаваб яз Ада лагьана:

– Квез Цаварин Пачагьлугъдин сирер кьатӀудай чирвилер ганва, амма абуруз ганвач. 12 Авайдаз авайдалайни гзаф гуда, авайди адахъ мадни артух жеда. Авачирди вичихъ авай гьа тӀимилдакайни магьрум жеда. 13 Абур килигзаватӀани, абуруз затӀни аквазвач, абуру яб гузватӀани, абуруз ван къвезвач, я абур гъавурда гьатзавач. ГьакӀ хьайила Зун абурухъ галаз кьисайралди рахазва. 14 Гьа икӀ, Яшай пайгъамбарди лагьай ихьтин гафар абурун кьилел къвезва:

«Япариз ван хьайитӀани, куьн гъавурда гьатдач,
вилералди килигайтӀани – аквадач.
15 А инсанрин рикӀер къван хьанва,
ва япаризни заландиз къвезва ван, вилерни мичӀнава;
абурун вилеризни аквадач, я япаризни ван къведач,
рикӀерини кьатӀудач,
чеб сагъар хъувун патални
Захъ элкъведач» ^a.

16 Аквазвай куь вилерни, ван къвезвай куь япар бахтавар я. 17 За квез рикӀивай лугьузва хьи, гзаф пайгъамбарризни гьахъ-михьи инсанриз квез аквазвай крар чпизни акуна кӀанзавай, амма акунач; квез ван къвезвайбурукай чпизни ван атана кӀанзавай, амма атанач.

18 Тум вегьизвайдакай кьисадин метлебдиз фикир це: 19 Цаварин Пачагьлугъдилай гаф ван жез гъавурда такьазвайди рекьин къерехдиз аватай тум хьиз я: шийирди атана адан рикӀе цанвай гаф чуьнуьхда. 20 Гьа и жуьреда къван квай чкадиз аватнавай тумни – ван хьанмазни гьасятда гаф шадвилелди кьабулдай инсанар я лагьай чӀал я. 21 Амма чпихъ мягькем дувулар тахьуниз килигна, абур яргъалди амукьдач. Чеб а гаф кьуна лугьуз хурук кутурла, чпин кьил баладик акатайла, абур гьасятда рекьелай алатда. 22 Къалгъанриз вегьенвай тум – гафунин ван къвезвайбур я лагьай чӀал я. Амма гьар йикъан къайгъуйри, девлетдихъ вил ичӀи хьуни ахьтинбурун рикӀера гьатнавай гаф пӀуьрчӀуькьарда, ам бегьер тагуз жеда. 23 Миян чилиз аватнавай тварар – гафуниз яб гана адан гъавурда акьазвайбур я. Гьа ксари вичин бегьерни гъида – сада вишра, пудкъадра, са бязибуру къанницӀудра артух бегьер гъида.