Matthew 15:1-20
Михьиди ва чиркинди
(Мрк. 7:1-23)
1Ахпа Исадин патав Ярусалимдай фарисеярни тавратдарар атана, Адаз лагьана: 2– Вучиз Ви тилмизри чи бубайрин адетрал амалзавач? Фу недайла, абуру чпин гъилер чуьхуьзвач. 3– Вучиз, квез адет хьанвай къайдаяр хуьн патал, куьне Аллагьдин тагьким чӀурзава? – жаваб гана Ада. – 4Аллагьди лагьанва: «Жуван дидедизни бубадиз гьуьрмет ая» a, «Дидедикайни бубадикай чӀурукӀа рахадайдан жаза кьиникь я» b. 5– 6Амма куьне лугьузва: «Инсанди вичин бубадиз ва я дидедиз „За вав вахгана кӀанзавай бурж за Аллагьдив ахгакьарда“лагьайтӀа, адаз диде-бубадиз гьуьрмет тийидай ихтияр ава». Гьа идалди куьне Аллагьдин гафар куь адетралди эвез ийизва. 7Кьве чин алайбур! Яшая квекай хъсандиз лагьанай: 8«И инсанри мецелди Заз гьуьрмет ийизватӀани, рикӀелди абур Завай яргъа я. 9Абуру Заз ийизвай ибадат гьаваянди я – инсанар абуру Зи тагькимрал ваъ, чпи арадиз гъайи къайдайрал амал ийиз вердишарзава» c. 10– 11Исади халкь Вичин патав кӀватӀна, лагьана: – За лугьузвай гафариз хъсандиз яб гана, гъавурда акьукь: инсандин сивиз атайда ам чиркин ийизвач, ам чиркин ийизвайди сивяй акъатайди я. 12Гьа чӀавуз тилмизар Адан мукьув атана: – Ви гафари фарисейрик хъел кутунвайди чаз чизва, – лагьана абуру. 13– Цавараллай Зи Бубади кутун тавур гьар са экъечӀай набатат кӀаняй акъатна терг жеда – жаваб гана Исади. – 14Хъфирай абур; абур буьркьуьбурун буьркьуь регьберар я; буьркьуьда буьркьуьдаз рехъ къалуриз хьайитӀа, абур кьведни фуруз аватда. 15– И кьисадин манадин гъавурда чун тур, – лагьана Адаз Петруди. 16– Куьн адан гъавурда гьелени акьазвачни? – лагьана Исади. – 17Бес квез чизвачни, сивиз атайди къенез физва, къеняйни ам къецел акъатзава. 18Сивяй акъатзавайди – рикӀяй акъатзавайди я, инсан чиркинни ийизвайди гьам я. 19РикӀяй къвезвайбур чӀуру ниятар, кьиникьар, зинавилер, явавилер, чуьнуьхунар, тапан шагьидвилер, буьгьтенар я. 20Ибуру вирида инсан чиркин ийизва, амма чуьхуьн тавур гъилерив тӀуьни инсан чиркин ийидач.
Copyright information for
LezIBTNT