Mat 22:23-33 | LezIBTNT | STEP | Гьа юкъуз Исадин патав кьейидалай кьулухъ инсандал чан хкведач лугьудай сакъаяр атана,

‏ Matthew 22:23-33

Кьейибурал чан хтуникай

(Мрк. 12:18-27; ЛкӀ. 20:27-40)

23 Гьа юкъуз Исадин патав кьейидалай кьулухъ инсандал чан хкведач лугьудай сакъаяр атана, 24 Адавай хабар кьуна:

– Муаллим! Мусади лагьанай: «Стхайрикай сад аялар тахьана кьейитӀа, къуй муькуь стхади адан паб къахчуна вичин стхадин тухум кухтурай» ^a.

25 Чи арада ирид стха хьана. Сад лагьайда паб гъана, амма вич кьена. Адахъ аялар тахьуниз килигна, адан паб кьвед лагьай стхадиз хкана. 26 Гьам хьиз кьвед лагьайдини, пуд лагьайдини, гьатта ирид лагьай стхани кьена. 27 Эхирдай гьа пабни кьена. 28 Ам вири стхайрик гъуьлуьк хьуниз килигна, абурал чан хтайдалай кьулухъ а паб ирид стхадикай гьи стхадин паб жеда?

29 – Квез я Калам, я Аллагьдин къуват течидайвиляй куьн гъалатӀ жезва, – жаваб гана Исади. – 30 Чан хтайла инсанрин арада я папар гъунар, я гъуьлуьз финар хъжедач. Абур цавараллай малаикар хьиз жеда.

31 Кьейибурал чан хтуникай рахайтӀа, квез и кардикай Аллагьди вуч лагьанватӀа куьне кӀелначни? 32 Ада лагьанай: «Зун Ибрагьиманни, Исакьанни, Якьубан Аллагь я» ^b. Ам кьейибурун ваъ, чан алайбурун Аллагь я.

33 И гафарин ван хьайи халкь Адан гафарал мягьтел хьана.