Mat 28:1-10 | LezIBTNT | STEP | Пакамахъ фад, гьафтедин сад лагьай юкъуз Маждалдай тир Майрамни муькуь Майрам кьветӀен патав атана.

‏ Matthew 28:1-10

Исадал чан хтун

(Мрк. 16:1-8; ЛкӀ. 24:1-10; Ягь. 20:1-8)

1 Пакамахъ фад, гьафтедин сад лагьай юкъуз ^{▼▼Чувудри гьафтедин сад лагьай югъ гьяд яз гьисабзава.} Маждалдай тир Майрамни муькуь Майрам кьветӀен патав атана. 2 Гьа чӀавуз зурба залзала хьана, Реббидин малаик цаварилай эвичӀна, кьветӀен сиве тунвай къван алудна, гьадал ацукьнавай. 3 Адан акунар цӀайлапандиз ухшар тир, адан пекерни жив хьиз лацу тир. 4 КичӀевиляй къаравулрикни адан вилик зурзун акатна, абур мейитар хьиз хьана. 5 Малаикди элкъвена папариз лагьана:

– КичӀе жемир, куьн хашуниз янавай Исадихъ къекъвезвайди заз чизва. 6 Ам ина амач. Ада Вичи лагьайвал, Адал чан хтанва. Фад инал ша, ингье Ам эцигай чкани. 7 Гьерекатна фена Адан тилмизриз Адал чан хтайдакай хабар це. Ам Галилейдиз тилмизрилайни вилик атана акъатдайди абурун рикӀел хкваш. Абуруз Ам гьана аквада. Ингье за квез вири гафар лагьана.

8 Тадиз кьветӀяй экъечӀна, папари кичӀевал ва зурба хвеш кваз Исадин тилмизриз хабар гуз чукурна. 9 Фидай рекье абурал садлагьана Иса гьалтна.

– Хийирар хьуй! – лагьана Ада абуруз.

Абуру Адав агатна, Адан кӀвачер кьуна, икрам авуна.

10 Гьанал Исади абуруз лагьана:

– КичӀе жемир. Фена Зи стхайриз Галилейдиз алад лагь, абуруз Зун гьана аквада.