Mat 3:1-12 | LezIBTNT | STEP | Гьа йикъара Ягьудатдин кьурумда инсанриз Ягья пайгъамбар пайда хьана.

‏ Matthew 3:1-12

Ягья пайгъамбардин чирвал

(Мрк. 1:1-8; ЛкӀ. 3:1-18; Ягь. 1:19-28)

1 Гьа йикъара Ягьудатдин кьурумда инсанриз Ягья пайгъамбар пайда хьана. 2 Ада икӀ лугьузвай:

– Ша Аллагьдин рекьел элячӀ, Цаварин Пачагьлугъдин чӀав атана мукьва хьанва.

3 Яшай пайгъамбарди лагьай гафарни Ягьядикай я: «Кьурумда гьарайзавайдан ван чкӀида: „Реббидиз рехъ гьазура, Ам къведай рехъ дуьзра“» ^a.

4 Ягьядал деведин сун пекер алай, адан юкьвани тумаждин чӀул авай. Ада незвайди цицӀерни чӀуру чӀижерин вирт тир.

5 Гьа чӀавуз адан патав Ярусалимдайни вири Ягьудатдай ва Ярдан вацӀун къерехра авай чкайрай инсанар къвезвай. 6 Абуру чпин гунагьар хиве кьазвай, Ягьядин кап алаз Ярдан вацӀа цик акахьун къачузвай. 7 Вичин патав цик акахьун къачун патал къвезвай гзаф фарисеярни сакъаяр акурла, Ягьяди абуруз лагьана:

– Эй гъуьлягъдин къеняй акъатайбур! Аллагьди хъиляй ацӀана квез гудай жазадикай квевай катиз жеда лагьай фикир куь кьилера ни туна? 8 Къуй куь хъсан крарин майвайри куьн Аллагьдин рекьел атанвайди къалуррай. 9 «Чи буба Ибрагьим я» лугьуз ацукьмир. За квез лугьузва хьи, Аллагьдивай и къванерни Ибрагьиман веледриз элкъуьриз жеда. 10 ЯкӀвни датӀана тарарин пунарив гьазур я: хъсан майваяр тегъидай гьар са тар атӀана цӀуз гадарда.

11 Квез Аллагьдин рекьел къвез кӀан хьайила, за квев цик акахьун къачуз тада. Амма залай кьулухъ къведайди залайни гзаф къудрат авайди жеда. Зун Адан кӀвачин къапар гваз къекъуьнизни лайих туш. Ада квев Пак Руьгьдик ва цӀук акахьун къачуз тада. 12 Адан йирф Вичин гъиле ава, Ада Вичин рат михьда, гатай къуьл Вичин бегьер хуьдай чкадиз кӀватӀда, нагъварни хкахь тийидай цӀал куда.