Mat 6:25-34 | LezIBTNT | STEP | ГьакӀ хьайила За квез лугьузва: вуч недатӀа ва я вуч хъвадатӀа лугьуз, жуван чан патал ва вуч алукӀдатӀа лугьуз жуван беден патал къайгъуйрик жемир. Чан тӀуьнилайни, беден пекерилайни артух тушни?

‏ Matthew 6:25-34

Къайгъуйрикай

(ЛкӀ. 12:22-31)

25 ГьакӀ хьайила За квез лугьузва: вуч недатӀа ва я вуч хъвадатӀа лугьуз, жуван чан патал ва вуч алукӀдатӀа лугьуз жуван беден патал къайгъуйрик жемир. Чан тӀуьнилайни, беден пекерилайни артух тушни? 26 Къушариз килиг: абуру я цазвач, я гуьзвач, я бегьер хуьдай чкайра кӀватӀзавач, амма цавараллай Бубади абуруз тӀуьн гузва. Куьн къушарилай артух тушни мегер? Квезни Аллагьди гуда! 27 Кат-галтуг авуналди квевай нивай жуван уьмуьр са сятдин хьайитӀани артухариз жеда? 28 Пекерин къайгъудани куьн гьатмир. Бубуяр гьикӀ экъечӀзаватӀа килиг: абуру я зегьмет чӀугвазвач, я са затӀ хразвач. 29 Амма За квез лугьузва хьи, гьихьтин иер пекер алай Сулейман пачагьни и цуькверикай садав гекъигиз хьун мумкин туш. 30 Къе никӀяй экъечӀна пака къулаз вегьидай векь Аллагьди гьикӀ чӀагурзаватӀа ^{▼▼ЧӀагурун – иер авун.} килиг! Ада а векь квелай артух чӀагурзавани, эй иманда зайифбур! 31 Гьа икӀ, куьн вуч неда, я вуч хъвада, я тахьайтӀа вуч алукӀда лугьуз къайгъуйрик жемир. 32 Мажусияр тӀуьн-хъунихъ галтугзавайбур я, цавараллай куь Бубадиз ибур вири квез герек тирди чизва. 33 Гьавиляй сифте куьне Аллагьдин Пачагьлугъ ва Адан гьахъ-михьивал жагъура. Амайди Ада квез кӀукӀни алаз гуда. 34 Гьа икӀ, пакагьан йикъан къайгъу чӀугвамир, адан къайгъуда пака хьухь. Къенин юкъуз къенин къайгъуярни бес я.